Құрметті Касимов Айбат! ҚР Конституциясының 1-бабына сәйкес Қазақстан Республикасы өзін демократиялық, зайырлы, құқықтық және әлеуметтiк мемлекет ретiнде өзін орнықтырады. Сонымен қатар, «Діни қызмет және діни бірлестіктер туралы» Заңының 3-бабының 1-тармағында мемлекет дін мен діни бірлестіктерден бөлінген. Діни білім беру ұйымдарын қоспағанда, Қазақстан Республикасында бiлiм беру мен тәрбиелеу жүйесі дін мен діни бірлестіктерден бөлiнген және зайырлы сипатта болады. Осыған тұрғыдан, «Орта білім беру ұйымдары үшін міндетті мектеп формасына қойылатын талаптарды бекіту туралы» ҚР Білім және ғылым министрінің 2016 жылғы 14 қаңтардағы №26 бұйрығы қолданыстағы заңнама нормаларына сәйкес әзірленген. ҚР «Білім туралы» Заңының 47, 49-баптарында оқушылардың мектеп формасын сақтауға және ата-аналардың мектеп формасымен қамтамасыз етуге міндеттілігі жүктелген. Мектеп формасына қойылатын бірыңғай талаптар қазақстандықтар үшін орта білім беру мекемелерінде міндетті түрде орындауға жататын нормативтік қағида болып табылады. Мемлекет білім беру саласында жалпыға ортақ қабылданған ішкі мінез-құлық қағидасын орындауға міндеттейді. Бұйрықтағы талаптар білім берудің зайырлы сипатын іске асыруға және орта білім беру ұйымдарында білім алушылардың арасында әлеуметтік, мүліктік және басқа да өзгешеліктердің белгілерін тікелей жоюға бағытталған. Олар білім алушылардың жас ерекшеліктеріне қарай мектеп формасының үлгісін, түсін регламенттейді. Қазақстан мұсылмандары діни басқармасы (бұдан әрі – ҚМДБ) Мектептегі киім үлгісіне қатысты ұстанымын 2017 жылғы 6 желтоқсанда жариялады. ҚМДБ өз ұстанымында ең әуелі мұсылман ер кісі мен әйел адамға білім алудың міндетті парыз екендігін атап көрсетеді. Ал мектеп жасындағы балаға білімді үйрету – әрбір адамның азаматтық әрі мұсылмандық борышы, сондай-ақ діни және зайырлы білім алу – жарқын болашақтың кілті екендігін назарға салады. ҚМДБ ислам діні балиғат жасына толмаған, санасы толық қалыптасып үлгермеген, орамал тағудың түпкі мәні мен маңызын, үкімін түсінбейтін кішкентай қыз баласына орамал тағуды міндеттемейтініне назар аударады. Мектеп табалдырығын енді ғана аттаған бүлдіршінді жаулық жабуға мәжбүрлеуден бұрын, оған ең әуелі білім мен тәрбие берген абзал. Бұл – ата-ананың басты міндеті болып табылады. Осы ұстанымында ата-аналарды мектеп оқушыларының киім үлгісіне қатысты қойылатын талаптарға түсіністікпен және сабырлықпен қарауға шақырады. Себебі, еліміздегі орта мектептерде оқушылардың киім үлгісін бірізділікке түсіру мақсатында мемлекет тарапынан шешім қабылданған деп есептейді. Осы орайда, ҚМДБ қыз-баланың толыққанды зайырлы білім алуына оқушылардың ата-аналары еліміздің заңнамасының талаптары шеңберінде қамтамасыз етуі жөн деп санайды. Осы ретте, «Білім туралы» Заңмен бекітілген орта білім беру ұйымдарының ішкі тәртібін сақтау мақсатында мектеп формасына қойылатын талаптар ар-ождан бостандығын бұзбайды, тиісінше мемлекет алдындағы міндеттемелерді орындаудан бас тартпауға үндейді. Жоғарыда айтылғандарды ескере отырып, ҚР Білім және ғылым министрінің 2016 жылғы 14-қаңтардағы №26 бұйрығында бекітілген орта білім беру ұйымдары үшін міндетті мектеп формасына қойылатын талаптар орынды деп санаймыз.