Құрметті Нұртаза Ермек! Сіздің еліміздегі тілдік ахуалға және мемлекеттік тілдің өз деңгейінде қолданылуына қатысты көтеріп отырған мәселеңіз орынды. Бұл – қазіргі таңда көпшілік тарапынан жиі көтерілетін өзекті мәселелердің бірі. Осы орайда, тiлдердi дамыту саласындағы бiрыңғай мемлекеттiк саясаттың iске асырылуын қамтамасыз ететін уәкiлеттi орган ретінде Комитет Қазақстан Республикасы Конституцияның 14-бабына, «Қазақстан Республикасындағы тіл туралы» Қазақстан Республикасы Заңының 7-бабына, «Ақпаратқа қол жеткізу туралы» Қазақстан Республикасы Заңының 16-бабы 14-тармағына сілтеме жасай отырып, «Самұрық-Қазына»-ға өтінішіңізде көтерілген мәселелер бойынша өз тараптарынан тиісті шаралар қабылдау және алдағы уақытта мұндай жағдайлардың қайталанбауын қадағалау туралы хат (15.12.2020 ж.№ 01/3322-И) жіберді. Сонымен қатар «Kaspi Bank» АҚ-ның (бұдан әрі – Банк) қосымша бағдарламасының қазақ тіліндегі нұсқасының жоқтығына қатысты шара қабылдау туралы жеке азаматтардан бірнеше өтініш келіп түскен болатын. Бұл ретте Комитет тарапынан Банкке аталған олқылықты түзетуге қатысты хат жолданған болатын. Банк жауабына сәйкес Kaspi.kz қолданбасының нұсқасы дайын, алайда пандемияға байланысты қазіргі кезде Банк ресурстары ел тұрғындарына көмектесуге арналған жобаларға бағытталғандығы айтылып, алдағы уақытта клиенттердің қолданбадағы барлық қызметті мемлекеттік тілде тұтына алу бағытында жұмыстар жалғасатыны хабарланды. Баяндалғандармен қатар тіл саясатын жүзеге асыру саласындағы белсенді азаматтық ұстанымыңыз үшін алғыс білдіреміз!