Қызылорда облысы 14.October.2021, 13:36

Ия, биыл еліміз үшін маңызды жыл. Біз үшін қастерлі саналатын егемендіктің қадір-қасиетін насихаттап, ұрпаққа үлгі ету үшін ауқымды шаралар ұйымдастырылды. Ұлттық құндылықтарымыз бен қайта жаңғырған қазақ мемлекетінің тәуелсіз жылдар аралығындағы жетістіктерін насихаттау мақсатында «Тұғыры биік Тәуелсіздік» атты республикалық ақындар айтысы, Сыр сүлейі Кете Жүсіп Ешниязұлының 150 жылдығына арналған «Жырлансын, Тәуелсіздік жыр бұлағы» атты республикалық жыршы-жыраулар байқауы өткізіліп, айтыскер ақындар тәуелсіз еліміздің 30 жылда бағындырған белестерін жырға арқау етсе, жыр жүйріктері Кете Жүсіп Ешниязұлының бұрын соңды көп орындалмаған жыр-дастандарын және Тәуелсіздік тақырыбында жазылған жыр шумақтарын Сыр мақамдары арқылы насихаттады. Елбасы Н.Ә.Назарбаевтың «Ұлы даланың жеті қыры» мақаласының «Дала фольклоры мен музыкасының мың жылы» жобасын жүзеге асыру мақсатында Сыр бойындағы аңыз әңгімелер, шежіре, батырлар жыры, қисса-дастандардың ел аузындағы нұсқаларын жинақтап, «Сыр өңірі фольклоры антологиясының» үш томдығын шығару жоспарланған болатын. Биылғы жылы антологияның І томы «Жанқожа батыр» деген атпен жарыққа шығып, ұлттық құндылығымыз толығып, рухани қауымға жол тартты. Бұл қазақ тарихындағы айтулы жыл – Ел Тәуелсіздігінің 30 жылдығына арналған үлкен тарту болып отыр.