Саламатсызба Жансейіт Түймебаев мырза! Былтырғы оқу жылынан бастап, өзіңізге және үкімет басшысы Кәрім Мәсімов мырзаға бірнеше рет хат жолдаған болатынбыз. Ол хатта Шымкент қаласы №66 «Қазығұрт» орта мектебінде әр оқушыдан ремонтқа 500 теңгеден және ҰБТ-ға дайындыққа 3 000 теңгеден ақша жиналып жатқандығы айтылған. Сіздер «Оны тексердік, ондай жағдай орын алмаған» - деп жауап қайтардыңыздар. Алайда, артынша мамыр айында облыс прокурорының көмекшісі Ж. Алиханова ханым осы мектептің мұғалімі Төлегенова Светлана мен мектеп директоры Төлендиев Ержан екеуін заңсыз дайындық курсын өткізіп отырған жерінен ұстап, оқушылардан «ҰБТ-ға дайындаймыз»-деп ай сайын әр оқушыдан 3 000 теңгеден ақша жинағандығын және бұл дайындық курсы мектепте емес Төлегенова Светлананың үйінде болатынын, ол жерде балаларға ешқандай жағдай жасалмағандығын, өрт қауіпсіздігі ережелері мен санитарлық талаптардың сақталмағандығын және салықтан жалтарып, оқушылардан ақша жинап, заңсыз кәсіпкерлікпен айналысқан деген айыптар тағып, «үш әкімшілік жауапқа тартылады»-деген қорытынды сөзін теледидардан көріп («Айғақ» телеарнасынан), есітіп ақиқаттың бар екендігіне көз жеткізгендей болдық. Алайда, бұл сеніміміз ақталмады, жауапқа тартылмақ түгілі Төлегенова Светлана кешегі жаңа 2009-2010 оқу жылынан бастап, директордың орынбасары қызметіне тағайындалды. Сонымен қатар, бала ұрумен аты шыққан сауатсыз мұғалім Ауғанбаев Мұрат та осындай қызметке ие болды. Бұл бала директор Төлендиев Ержанның ағайын-туыс інісі, екеуі бір ауылдан. Сонда біз балаларымызды кімдерге тапсырдық. Қашанғы жемқорлық жайлаған қоғамда үндемей өмір сүре береміз. Осының барлығы парамен шешілгендігі айдан анық. Сіз Елбасымыз Нұрсұлтан Назарбаевтың «Жемқорлыққа қарсы он соққы» жолдауына өз үніңізді қосып, осы жағдайларға шара қолдана аласыз ба? Шара қолданбаған жағдайда біз балаларымызды бұл мектептен алып кетеміз.