Елбасының биылғы Жолдауында сапалы ауыз сумен қамтамасыз мәселелері – халықтың денсаулығын жақсартудың аса маңызды міндеті екені, сондықтанда жерасты суларының әлеуетін кеңінен пайдаланып, сумен қамтамасыз етудің жаңа нысандарын салу кезінде жүйелі қадамдар жасау қажет екені айтылған. Ауданда республикалық «Таза су» бағдарламасы бойынша су тазарту қондырғылары салынып пайдалануға берілгенмен, қуаңшылық жылдары өзен көлдердегі су тартылып кетіп, су қондырғыларына су соратын мүмкіндіктер болмай қалу фактілері жиі орын алуда. Сонымен қатар қондырғыларға қажетті жөндеу жұмыстарын айтпағанда, тек сүзгісін ауыстырып, дәрумендер алуға жыл сайын көптеген қаржы аудандық бюджеттен жұмсалуда. Аудандағы су құбырынан тазартылған судың нұсқалары алынып, санитарлық-микробиологиялық зерттеу нәтижелері бойынша ауыз су есебінде пайдалануға сәйкес келмейтіні анықталды. Сондықтанда бұл су қондырғылары арқылы ауыз су жіберу өте тиімсіз және болашағы жоқ екені белгілі болып отыр. Осы жағдайларды ескеріп «Ақбұлақ» бағдарламасы бойынша бөлінетін қаржыдан көршілес Бөкейорда ауданының іргелес жатқан Искра елдімекені маңынан Құлшық және Искра жер астындағы мол су қорынан су құбыры арқылы ауданымыздың барлық елді мекендеріне су тартуға техникалық-экономикалық негіздеме және жобалық-сметалық құжаттар жасатуға ықпал етуді сұраймыз.