Администратор 12.04.2013

Құрметті Талап! Қазақстан Республикасы Үкіметінің 2012 жылғы 21 маусымдағы №821 қаулысымен «Қолжетімді тұрғын үй – 2020» бағдарламасы бекітіліп іске асырылуда. Бұл бағдарламаның екінші бағыты бойынша тұрғын үй құрылыс жинақ банк желiсi арқылы тұрғын үй сатып алу халықтың барлық санаттары үшiн көзделінген және бұл бағыт бойынша азаматтар «Тұрғын үй құрылыс жинақ банкісінің» салымшысы болған жағдайда ғана пәтер алуға құқылы. Қазақстан Республикасының 2000 жылғы 7 желтоқсандағы «Қазақстан Республикасындағы тұрғын үй құрылыс жинақтары туралы» Заңының нормаларына сәйкес, қарыз алу үшiн тұрғын үй құрылыс жинақ шарттарының талаптарын орындаған жағдайда «Бастау», «Өркен», «Кемел», «Болашақ» тарифтік бағдарламаларының өзіңізге ыңғайлысын таңдауыңызға болады. Сондықтан, бағдарламаның осы бағыты бойынша пәтер алу үшін, Қонаев гүлзары 13 үйде орналасқан ТҮҚЖБ-не хабарласуыңызға болады. Сонымен қатар, Қазақстан Республикасы «Тұрғын үй қатынастары туралы» Заңының 67,74 баптарына сай, тұрғын үйге мұқтаж, осы елді-мекенде тұрақты тұратын және төмендегі санаттар бойынша: 1) Ұлы Отан соғысының мүгедектері мен қатысушылары 2) халықтың әлеуметтік әлсіз топтары 3) мемлекеттік, әскери, бюджеттік мекеме қызметкерлері 4) жалғыз тұрғын үйі авариялық жағдайда деп танылған және кезекке тіркелген азаматтар мемлекеттік тұрғын үй қорынан Заңда белгіленген тәртіппен кезек арқылы тұрғын үймен қамтамасыз етіледі. Бұл жергілікті атқарушы органда жүзеге асырылады. Егер Сіз жоғарыда көрсетілген санаттардың біріне енсеңіз және Шымкент қаласының тұрғыны ретінде тіркеуде (прописка) болсаңыз, мемлекеттік тұрғын үй қорынан тұрғын жай алу үшін кезекке тіркелу мәселесі бойынша халыққа қызмет көрсету орталықтарына құжаттарыңызды тапсыруыңызға болады.