Администратор 26.10.2011

Екі жыл бұрын айтқан болатынмын: Құлсары қаласын Атыраудан кейінгі екінші қала, яғни облыстың екінші қақпасына айналдырамыз деп, міне, бүгін Құлсарының келбеті адам танымастай өзгертілгенін жақсы білесіздер. Қалада 55 мың халық тұрады. Оған қоса бұл жерде дүниежүзілік маңызды жобалар жүзеге асуда, онда әлемнің түкпір-түкпірінен келіп мамандар жұмыс жасауда. Қалаға жан-жақтан қонақтар келіп-кетіп жатыр. Айтқан уәдемізге тұрып, Құлсары Атырау сияқты, көрікті, қазіргі заманғы сәулетке сай жаңа келбетке ие болады. Осы сөзімізді іске асырып, қазірдің өзінде бүкіл поселке жолдары қайта салынып, көшелер абаттандырылып, жарықтандырылып, жаңа парктер мен аллеялар іске қосылды. Гүлзарлармен көркемделді. Одан басқа көптеген әлеуметтік нысандар: мектептер, емдеу мекемелері, спорттық ғимараттар мен мәдениет орындары, ауыз су, газ, жылу, жарық, канализация жүйелері салынды. 3 жыл бұрын «Игілік бағдарламасы бойынша бөлінетін қаржыны жергілікті жерге қалдырған болатынмын. Соның арқасында ондаған жылдар бойы су тапшылығынан зардап шегіп келген, мұнайлы, қазыналы ауданның орталығы – Құлсары биыл жаңа су құбырымен, таза, сапалы ауыз сумен 90 пайыз қамтылады. Ал 2012 жылы бұл жұмыстар толықтай аяқталады. Сонымен Құлсары қаласы 100 пайыз қамтылып, алдағы елу жылда су проблемасы болмауы керек. Міне, халыққа ең бірінші қажеттіліктің бәрі іске қосылды. Осыдан басқа адамға не керек! Әрине, жұмыстар бұнымен шектелмейді. Енді қаланы жасылдандыру, ағаш егу, гүлзарлар мен бақтарды отырғызу қажет. Одан басқа да атқаратын жұмыстар бар.