Құрметті Самат Сапарбекұлы! Біздің туыстарымыз Солтүстік Қазақстан облысы, Қызылжар ауданы, Белое ауылының Октябрьская көшесі, 2 үй мекен-жайы бойынша тұрады. Жақында туыстарымыздың үйіне қонаққа барып қайттық. Белое ауылының қазіргі жағдайын көріп, көңіліміз қатты жабырқап, аудан, облыс басшыларына қатты ренжіп қайттық. Өйткені облыс орталығы Петропавл қаласының түбінде тұрған Белое ауылының көшелеріне, әсіресе Октябрьская көшесіне асфальтты айтпағанда, мүлдем тас та төселмеген. Көшелер әбден ойылып, тозығы шығып кеткен. Көлік былай тұрсын, жаяу адамның өзі жүре алмайды. Жаңбыр жауып тұрған кезде Октябрьская көшесі, 2 мекен-жайындағы туыстарымыздың үйіне әзер дегенде жеттік. Белое ауылына ауыз су жүйесі де тартылмаған екен. Белое ауылының тұрғындары ауыз суды Петропавл қаласынан сатып алып, тасып әкеліп ішеді екен. Туыстарымыздың айтуынша, қыс кезінде де Белое ауылының Октябрьская көшесі қардан мүлдем тазартылмайтын болып шықты. Күз, қыс және көктем мезгілінде ауыл көшелері жаңбыр суы мен қарға толып жатса, жаз кезінде шаң-топыраққа батып жатады. Қазіргідей өркениет дамыған заманда, Елбасымыз шенеуніктерге барлық жағдайды жасап, тек қана жұмыс істеуді ғана талап етіп отырған кезде Солтүстік Қзақстан облысы орталығының дәл түбінде орналасқан Белое ауылының әлеуметтік ахуалы осыншалықты құлдырап кеткені қалай сонда? Белое ауылының көшелеріне, әсіресе Октябрьская көшесіне басынан соңына дейін тас төсеп, жөндеп, ретке келтіріп қоюға, Белое ауылының тұрғындарын таза ауыз сумен тұрақты қамтамасыз етуге бюджеттен мүлдем қаражат бөлінбейтін болғаны ма? Неге аудан және ауыл әкімдері осы мәселені шешуге іс-әрекет етпеген? Сізге біздің үлкен өтінішіміз - Белое ауылының Октябрьская және басқа да көшелеріне тас, асфальт төсетіп, ретке келтіруге және Белое ауылының тұрғындарын таза ауыз сумен қамтамасыз етуге аудан және ауыл әкімдеріне, облыстың басқа да мекеме, ұйымдарының басшыларына тапсырма беруіңізді, осы мәселелерді өзіңіздің жеке қатаң бақылауыңызға алуыңызды сұраймыз!