Қызылорда облысы 23.December.2016, 16:53

Құрметті Ербол! Сыр бойына ғана тән ұлттық құндылықтарды насихаттау, дамыту, дәріптеу тұрғысында Қызылордада Түркі тілдес елдердің «Қорқыт және Ұлы Дала сазы» атты дәстүрлі музыкалық өнер фестивалі үш жылда бір өткізу жолға қойылған. Түркі тілдес елдермен өзара мәдени қарым-қатынасты нығайту, өскелең ұрпақ санасына сіңіру, тілі ұқсас, діні ортақ елдердің салт-дәстүрлерін, қайталанбас өнерінің озық үлгілерімен бірге түркі әлемінің әлі зерттелмеген, өзгеге ұқсай бермейтін бай мұраларымен жұртшылықты таныстыру және кеңінен насихаттау мақсатында өткізілетін бұл фестивальдің Сыр өнері тарихынан алар орны ерекше. Айтулы өнер мерекесіне Қазақстан, Әзірбайжан, Қырғызстан, Өзбекстан, Түркия, Молдова елдерінен, Ресей Федерациясының Татарстан, Алтай, Якутия, Хакасия, Башқұртстан республикаларынан әйгілі ғалымдар, фольклортанушылар, өнер зерттеушілері және өнерпаздар мен өнер ұжымдары қатысқан. Үлкен дәрежедегі халықаралық шара мәдени достықтың алдағы уақытта да жалғаса беретіндігін дәлелдеді. Ұлттық құндылықтарымыздың ішінде жыршы-жыраулардың алатын орны ерекше. Осы жыршылық өнерді жас ұрпаққа насихаттау бағытында жыл көлемінде жыршы-жыраулар конкурсы, түрлі деңгейде фестивальдар ұйымдастырылуда. Атап айтар болсақ, 2016 жылдың маусым айында фольклортанушы ғалым, белгілі жырау, Қазақстанның еңбек сіңірген қайраткері Алмас Алматовтың 60 жылдық мерейтойы аясында «Өнер – түркі халықтары бірлігінің негізі» атты халықаралық ғылыми-тәжірибелік конференция, «Ұлы дала әуендері» атты дәстүрлі орындаушылардың концерті және Ел Тәуелсіздігінің 25 жылдығы құрметіне қараша айында дәстүрлі орындаушылардың республикалық өнер фестивалі ұйымдастырылды. Аталмыш шараларға Әзірбайжан, Өзбекстан, Қырғызстан, Түркия елдері мен Түркі Академиясының ғалымдары дәстүрлі өнердің дамуы және оның перспективалары туралы баяндамалар жасап, концерттер мен фестивальдерге белгілі өнер иелері Арқа, Жетісу, Батыс жыршылық мектептерінің өкілдері Алмас Алматов, Рамазан Стамғазиев, Ерлан Рысқали, Елмұра Жаңабергенова, Айгүл Қосанова, Ардақ Исатаева, Ұлжан Байбосынова және Сыр елінің жыршылары қатысты. Тәуелсіздік жылдарында атқарылған игі істердің бір көрінісі – дәстүрлі өнерді жалғастырушы Сыр бойының 22 жыршы-жырауларының орындауында Тұрмағамбет Ізтілеуовтің аудармасындағы Фердоусидің «Шаһнама» эпопеясының музыкалық антологиясы, фольклортанушы ғалым Алмас Алматовтың авторлығымен «Шыңғыснама», «Жыр керуені» кітаптары, «Шыңғыснама» музыкалық дастаны жарыққа шықты. Сондай-ақ, жыршы-термеші Ж.Аққұловтың орындауында Тұрмағамбет Ізтілеуовтың терме толғауларынан дискі және белгілі жырау Р.Көшенейұлының 70 жылдығына орай «Қазақстың күміс көмей Көшенейі» атты жинақ дискі жарық көрді. Биылғы жылы Баку қаласында өткен халықаралық мугамдар конкурсында Қармақшы ауданы К.Рүстембеков атындағы Жыраулар үйінің шәкірті Малика Алдамжарова қатысып, жүлделі ІІІ орынды иеленді. Ал, айтыс өнері халықтың ең бір ерекше өнері, қазақ тілінің сөздік қорын қамтитын бай қазына. Халқымыздың экономикалық –шаруашылық, мәдени өмірінің, қоғамдық қарым-қатынасының тарихи із таңбасы да осында. Өздеріңіз білесіздер осы жылдың қараша айында Қызылорда қаласында Қазақстан Республикасы Тәуелсіздігінің 25 жылдығы құрметіне арналған Халықаралық айтыс өтіп, оған республикаға белгілі ақындармен қатар Қытай, Моңғолия, Қырғызстан елдерінен 16 ақын қатысты. Осы жыр додасының және еліміздің түкпір-түкпірінде болып жатқан аламан айтыстардың жеңімпаздары Мұхтар Ниязов пен Сұлтанхан Мейірбекті ерекше айта кету керек. Мұхтар Ниязов биылғы жылы да «Алтын домбыра» республикалық ақындар айтысында «Алтын домбыраны» екінші мәрте жеңіп алса, Сыр елінің өнерін асқақтатып, мақтанышына айналған Мейірбек Сұлтанхан биыл «Сыр үміті» номинациясымен марапатталды.