Қызылорда облысы 14.09.2018

Сұрағыңызға рахмет, Оңболсын! Бүгінгі күнге облыста тұрғын үй кезегінде 26 мыңнан астам азамат тұр. Оның басым көпшілігін халықтың әлеуметтік әлсіз топтары құрайды. Ия, өзіңіз айтып отырғандай бұл санаттағы азаматтардың алғашқы жарна жинауға мүмкіндіктері жоқ. Біз бұл мәселені орталық атқарушы органдар алдында бірнеше рет көтеріп, бірқатар ұсыныстарымыз Үкімет тарапынан қолдау тапты. «Нұрлы жер» тұрғын үй құрылысы бағдарламасына өзгеріістер енгізіліп, кредиттік тұрғын үй - кезекте тұрғандарға және құрылыс жинақ банкінің салымшыларына өткізілмеген жағдайда, жергілікті атқарушы органдарға кредиттік тұрғын үйлерге өз бетінше иелік етуіне мүмкіндік берілді. Осыған орай, облыстық бюджет есебінен де қолжетімді тұрғын үйлердің құрылысын жалғастырып, халыққа тұрғын үй сатып алуға бастапқы жарнаның талап етілмей, жеңіл жағдайлар жасау үшін «Орда» жол картасын қабылдадық. Жеке құрылыс салушылардан тұрғын үйлерді сатып алуға немесе жаңа тұрғын үйлерді салуға облыстық бюджеттен қаржы бөлінетін болады. Тұрғын үйлерді өткізу құрылыс жинақ банкінің механизмі арқылы іске асырылады. Тұрғын үй алуға кезекте тұрғын азаматтар қатыса алады. «Орда» жол картасының талаптарына сай келетін азаматтар бастапқы кезде тұрғын үйдің жалпы құнының 50 пайызын жинақтай отырып, тұрғын үйді 8 жылға жалға алады. Тиісті мерзім аралығында бастапқы жарна жинақталғаннан кейін, тұрғын үйді сатып алу үшін 11 жылға дейін банктен (3,8 пайызбен) кредит алады.