Құрметті: Кәрім Қажымханұлы, Қайрат Нематұлы, Иманғали Нұрғалиұлы Біздер, үлескерлер 2005 жылы «Альянсстройинвест» ЖШС құрылыс мекемесінің Бас директоры Ринат Абайұлы Наймановпен Қабанбай батыр даңғылының бойынан, «Нұр Астана» мешітінің жанынан салынатын «Infiniti-2» тұрғын үй кешенінен пәтер алуға банкілерден несие алып, көп жылдар бойы маңдай терімізді төгіп тапқан қаражаттарымызды толық төлеп келісім-шартқа отырдық. Аталған келісім-шарттың 1.2. тармағына сәйкес тұрғын үй кешенін, пәтерлерімізді 2007 жылдың 4 тоқсанында салып беруі керек еді. Келісім-шарттың 5.2. тармағы бойынша, егер үйді осы көрсетілген уақытында салып бермесе, әр күнгі кешіктіргені үшін 0,001 (%) пайыз айыппұл төлеуі қажет. Бұл банкіге салынған депозиттің жылдық өсімінің 30-дан 1-бөлігі ғана. Халықты тонау үшін, өз жеке басының пайдасын ғана ойлап жасаған 0,001 %. 2007 жылы күзге дейін үйдің тек қана төменгі бөлігі фундаментін ғана салған. Содан бері үй салынбай тоқтап тұр. Найманов Р.А. бір жылдан бері әртүрлі сылтау, өтірік айтып, үйді салып беретін емес. Үйімізді Найманов Р.А. уақытылы салып бермеуіне байланысты әр жерден пәтерлер жалдап, саяжайларда тұрып, ипотекалық несиелерді төлеп, балаларымызбен, отбасыларымызбен көптеген қиындықтар көріп жатырмыз. Жоғарыда айтылғанды ескеріп: 1. «Альянсстройинвест» ЖШС құрылыс мекемесінің Бас директоры Р. А. Наймановқа қатаң шара қолданып, жасалынған келісім-шарт бойынша «Infiniti-2» тұрғын үй кешенін салдырып берулеріңізді сұраймыз. 2. Төмендеу пайызбен үйді салуға жеткілікті қаражатпен жәрдемдесулеріңізді сұраймыз. 3. Берілетін қаражатқа, оның жұмсалуына, үйдің жоба бойынша салуына қатаң бақылауды сұраймыз. Сіздерді құрметтеуші: Үлескерлер тізімі: Бүркітбаев А., Сарсенбекова Д., Рахимжанов Н., Жәрімбетова А. т.б.