«Қоғамдық бақылау туралы» және «Онлайн петиция» туралы Заң жобалары бірінші оқылымда мақұлданды

Парламент Мәжілісінің жалпы отырысында "Қоғамдық бақылау туралы" және "Қазақстан Республикасының қоғамдық бақылау мәселелері жөніндегі кейбір заңнамалық актілерге өзгерістер мен толықтырулар енгізу туралы" Қазақстан Республикасының Заң жобалары ("Онлайн петициялар") бірінші оқылымда мақұлданды.

Аталған актілер Қазақстан Республикасының Президенті Қ. К. Тоқаевтың 2020 жылғы 1 қыркүйектегі Қазақстан халқына Жолдауында қойған қоғамдық бақылауды күшейту саласындағы міндеттерді орындау үшін құқықтық жағдайлар жасау мақсатында әзірленген еді.

Ақпарат және қоғамдық даму министрі Дархан Қыдырәлі «әзірленген заң жобасы – бұл барлық мүдделі тараптар, оның ішінде құрметті сарапшы, заңгерлер, құқық қорғаушылар, қоғам қайраткерлері кірген жұмыс тобының барлық мүшелерінің ұжымдық еңбегі» деді. Сондай-ақ «Заң жобалары елде қоғамдық бақылауды жүзеге асырудың тиімді жүйесін құруға мүмкіндік береді» деп атап өтті.

Мәселен заң жобасына сәйкес қоғамдық бақылауды жүзеге асыратын адамдардың, оның ішінде Қазақстан Республикасының азаматтары мен коммерциялық емес ұйымдардың құзіреті едәуір кеңейтілді.

«Қоғамдық бақылау туралы» заң жобасында алғаш рет қоғамдық бақылауды жүзеге асырудың заңдылығы, жариялылығы, ашықтығы, еріктілігі мен тәуелсіздігі белгіленді.

Сонымен бірге Мәжілісте онлайн петициялар институтын енгізу мәселелері бойынша түзетулер қаралды. Онда әрбір қазақстандық арнайы платформа арқылы онлайн петициялар жасау бастамасын көтере алады.

• 30.12.2022
• 447