Құрметті Павлодар облысының тұрғындары!

Жақын арада біз төрімізге енетін Жаңа 2023 жылды қарсы аламыз. Өткен жылды қортындылап, келер жылға жоспарларды айқындайтын шақта әр адам жақсылықтан үміт күтеді. 

Кетіп бара жатқан жылдың қуанышты да, қиын сәттері де болды. Күн мен түннің алмасқанындай, ақ пен қараның қатар жүргеніндей, 365 күн де өте шықты. Таңның атысынан, кештің батысына дейін үйдің қамы, елдің қамы деп аянбай еңбек етіп жүрген әр облыс тұрғынына алғысымды айтқым келеді. 

Бәріміз де жаңа жылдан жақсы өзгерістер күтіп, армандарымыздың орындалуына сенеміз. Биылғы жылы орын алған сәтсіздіктер мен қателіктердің бәрінен сабақ алып, сынды сын деп қабылдағанда ғана, одан оң нәтиже шығара аламыз. 2023 жылы біз әлеуметтік маңызды жобаларды іске асырып,  қалалар, аудандар мен ауылдарды одан әрі дамытуды жалғастырамыз. Мемлекет басшысының алға қойған мақсаттарын орындап, Әділетті Қазақстанды құру жолындағы тапсырмаларды орындайтын боламыз.

Құрметті жерлестер! Жаңа Жыл сіздерге қуанышты күндерімен келсін. Ағайын- туыстарыңыз бен жақындарыңызға мықты денсаулық, отбасыларыңызда шаттық пен амандық тілеймін!

Жаңа жыл бәрімізге бақыт сыйласын!

• 31.12.2022
• 389