Өңір басшысы Тереңкөл ауданына жұмыс сапарымен барды

Павлодар облысының әкімі Асайын Байхановтың жұмыс сапары Песчан жөндеу-механикалық зауытынан басталды. 1994 жылы іске қосылған кәсіпорын бүгінде жылыту қазандықтарын, жүк көтергіш жабдықтарды әзірлейді, тракторлар мен агрегаттардың жөндеу жұмыстарын жүргізеді. Зауыт өнімдері Ақмола, Қостанай, Шығыс Қазақстан, Солтүстік Қазақстан, Абай облыстарына жеткізіледі. Песчан ЖМЗ өндіретін ауылшаруашылық техникаларына арналған бөлшектер жеке сипаттамалары бойынша шетелдік аналогтардан кем емес, сонымен бірге, 2,5 есе арзанға түседі.

Кәсіпорын қызметкерлері облыс әкімімен кездесуде ауыл үшін ең өзекті мәселе - таза ауыз сумен қамтамасыз етуді сұрады. Ауылды орталықтандырылған сумен жабдықтау жүйесі 60-жылдардың соңында салынған. Су жүйесі реконструкуиядан соңғы рет 2006 жылы өтті. Қазіргі кезде су жинау және су тазарту құрылыстары жабдықтарының тозығы жеткен. Ауылдағы 923 ауланың 623-і сумен жабдықтау жүйесіне қосылған. 2023 жылы су құбырлары жүйесіне жөндеу жүргізу жоспарлануда, бұл мақсаттарға бюджеттен 2,5 млрд. теңге бөлінді.

Сондай-ақ, өңір басшысы ауданның бірқатар әлеуметтік нысандарын аралады. Асайын Байханов Песчаное ауылындағы "Балдырған" балабақшасына барды. Мұндағы 6 топта 109 бүлдіршін тәрбие алады, оның ішінде 3 санаторий-сауықтыру тобы тегін, оның ішінде біреуі тәулік бойы білім береді. Балабақша меңгерушісі Елена Луциктің айтуынша, 2006 жылы ашылғаннан бері балабақшаға күрделі жөндеу жүргізілмеген. Қазір күрделі жөндеу жұмыстарына 136,0 млн. теңге сомасының жобалық-сметалық құжаттамасы бар, алайда, ол үшін қаржыландыру қажет. Ауылдың әлеуметтік инфрақұрылымын жақсартуға бағытталған жобаны қолдау туралы шешім қабылданды.

Бұдан кейін облыс әкімі Тереңкөл ауылындағы орталық аудандық ауруханаға барды. Ғимарат 1969 жылы салынған және қазіргі кезде апатты жағдайда тұр. Аурухана 25 орынға, күндізгі стационар 13 орынға шақталған. Ауруханада күрделі жөндеу жұмыстары соңғы рет 2014 жылы жүргізілді. Өңір басшысы облыстың денсаулық сақтау басқармасына ЖСҚ әзірлеп, сметаны әзкрлеуді және жобаны бюджеттік комиссияның қарауына ұсынуды тапсырды.

Сонымен қатар, Асайын Байханов Тереңкөл ауданының балалар мен жасөспірімдер спорт мектебінің қызметімен танысты. Мұнда 680 бала спортпен шұғылданады. Әкім спорт мектебінің тәрбиеленушілерімен кездесіп, олардың жетістіктері мен болашақ жоспарлары туралы сұхбаттасты, сондай-ақ, балаларға спорттық құрал-жабдықтар мен форма сыйлады.
БЖСМ ғимараты 2002 жылы салынған, алайда, мектепке күрделі жөндеу қажет. Ғимарат бойынша ЖСҚ әзірлеу туралы шешім қабылданды, оған қажетті қаражат бюджеттен биыл бөлінетін болады.

• 09.01.2023
• 228