ҰЛЫС ОҢ БОЛСЫН, АҚ МОЛ БОЛСЫН!

Құрметті жетісулықтар!

Ұлыстың ұлы күні – Наурыз мейрамымен шын жүректен құттықтауымды қабыл алыңыздар!

Адамзат баласы асыға күтетін жыл басы Наурыздың тарихы тереңде. Бұл айда табиғат оянып, тіршілік жанданады, көк өніп, жақсылық молаяды. Адамдар бірі-біріне ерекше мейірім танытып, дәстүрлі халықтық, ұлттық құндылықтарды кеңінен паш етеді. Бүгінгі дәуірге жаңғыра жеткен бұл көне мейрам соңғы жылдары жаңа, терең мазмұнда тойланып, оның жалпыхалықтық сипаты айқындала түсуде. 

Әз-Наурыз – қоғамды біріктіруші, бірлік пен татулыққа үндеуші. Ұлтына, діни наным-сеніміне қарамастан азаматтарды адамгершілік идеясының аясына топтастыратын қастерлі мейрам. «Жақсылық қылған жерде тапшылық тұрмайды», - дегендей, осы айда қайырымдылық, өзара көмек шаралары кеңінен атқарылады. Ізгі тілектер ақтарылып, дастархан дәмге, маңай ізгі шуаққа толады.

Табиғат-Анаға деген қамқорлық, адал еңбекке баулу, үлкенді құрметтеу, кішіге тілекші болу – Наурыздың ажырамас бөлігі. Көпшілік бұл мерекеде тал егіп, бұлақтың көзін ашады.  

Осы күні ұлттық салт-дәстүрлеріміздің мән-мағынасы, ішкі мазмұны барынша ашылып, айқындала түседі. Бауырластықтың бағасы артып, ынтымақ еселенеді. Бүгінде дамудың жаңа кезеңіне өтіп отырған еліміз үшін ішкі бірлігін, мемлекеттің тұғырлығы мен тұтастығын сақтаудың маңызы зор. Осы орайда Наурыз мерекесі жетісулықтардың ауызбіршілігін бұрынғыдан да бекемдеп, жаңа жетістіктерге жетелей түседі деп сенемін.

Ұлыс мерекесі әр шаңыраққа жақсылық, молшылық, бақ-береке әкелсін! Еліміздің іргесі тыныш, ырысы-несібесі мол болсын. 

Құрметпен, Бейбіт Өксікбайұлы Исабаев

• 24.03.2023
• 166