1 Мамыр – Қазақстан халқының бірлігі күнімен

Құрметті жерлестер!  

Қазақстан халқының бірлігі күні мерекесімен құттықтауымды қабыл алыңыздар!

Бұл маңызды мемлекеттік мереке тарих пен тағдыр біріктірген бүгінгі қоғамымыздың ұлттық тұтастығымен ынтымағының символы іспеттес.

Біздің қойнауы құтты Жетісу өлкесі сандаған этнос өкілдерінің басын біріктіріп, олардыңбар мақсат-мұраттарын бір арнаға тоғыстырып отыр. Қилы кезеңдерді бастан кешіп, түрлі оқиғаларды өткерген халқымыз тегіне, дініне, пікір алуандығына қарамастан, ортақ ұстаным, мемлекет мүддесі жолында топтаса алды. Президентіміз Қасым-Жомарт Тоқаев айтқандай, «Жетісу өңірі «Саналуандықтың бірлігі» ұстанымын іс жүзінде танытып келе жатыр».

Бүгінде мемлекетіміздің жаңа өзгерістерге бет бұрып, саяси және әлеуметтік-экономикалық реформалардың маңызды кезеңдеріне қадам басқан шағында өзара сыйластық пен сенімді, татулық пен тұрақтылықты сақтай білудің маңызы зор. Алға қойған мақсат-міндеттерге күш-жігерімізді жұмылдырудың, ауызбірлігімізді арттырудың арқасында және әділеттілік ұстанымы мен заңның үстемдігін орнықтыру арқылы қол жеткізе аламыз. Біздің елжандылығымыз, жауапкершілігіміз, байыпты көзқарасымыз, азаматтық бастамашылдығымыз – жаңа қоғам құрудың, ұрпақтардың лайықты болашағын жасаудың басты тетігі. Бұл ретте ортақ іске үлес қосу -әрқайсымыздыңпарызымыз.

Бірлігі жарасқан елдің тірлігі де өнімді. Әрқашан ынтымағымыз артып, ырысымыз мол болсын. Баршаңызға мықты денсаулық, еңбекте табыс, отбасыларыңызға бақ-береке тілеймін.

• 02.05.2023
• 117