Алынбайтын қамалдар құрмаңыздар: Асайын Байханов аймақта туризмді дамытудың нақты жоспарының жоқтығы туралы.

Жыл басынан бері облыста жұмыспен қамтудың өңірлік картасы бекітіліп, жүзеге асырылып келеді, оған сәйкес 25 мың жұмыссызды жұмысқа орналастыру жоспарлануда.

Картаны іске асыру нәтижелері мен қабылданып жатқан шаралар туралы жұмыспен қамтуды үйлестіру және әлеуметтік бағдарламалар басқармасының басшысы Альмира Дисюпова баяндады.

- Бірінші тоқсанның қорытындысы бойынша жеті мыңға жуық жаңа жұмыс орны құрылды, бұл өткен жылдың сәйкес кезеңімен салыстырғанда 4634 орынға артық. Мемлекет басшысының "10 мың тұрғынға 100 жұмыс орнын құру" бастамасын іске асыру аясында 1487 адам жұмысқа орналастырылды. Спикер атап өткендей, халықтың жекелеген санаттары үшін арнайы жұмыспен қамту жобалары қарастырылған.

Асайын Байханов әкімдердің назарын жаңа жұмыс орындарын құру бойынша жоспарлы көрсеткіштердің орындалуы бойынша жеке жауапкершілікке аударды.
- Мемлекет басшысының сайлауалды бағдарламасын және кәсіпкерлікті дамыту жөніндегі ұлттық жобаны орындау бойынша Жол Картасы шеңберінде барлық KPI сапалы орындалуын қамтамасыз ету қажет, - деп тапсырды облыс әкімі.

Сондай-ақ, аппараттық кеңесте жаңа туристік маусымға дайындық мәселесі талқыланды. Өңір басшысы курорттық аймақтарда көрсетілетін қызметтердің таныстырылымдарын сыни тұрғыдан бағалап, бұл мәселеде жергілікті атқарушы органдардың басты міндеті жеке инвестицияларды тарту үшін жағдай жасау және қажетті инфрақұрылымды дамыту болып табылатынын атап өтті.

- Тағы да сол таусылмайтын мәселелер. Әлі күнге дейін бұл саланы дамытудың нақты жоспары жоқ. Қандай жобалар жүзеге асырылатынын ешкім нақты айта алмайды. Алынбайтын қамалдар құрудың қажеті жоқ, мұнда нақтылық қажет - деп талап етті Асайын Байханов.

Облыс әкімі кәсіпкерлік және индустриялық-инновациялық даму басқармасының басшысына негізгі жобалар пулын айқындай отырып, алдағы 3-5 жылға туристік саланы дамыту бойынша жоспар-презентация дайындауды және оны бір ай ішінде талқылауға ұсынуды тапсырды. Сондай-ақ, 1-маусымға дейін туристердің баратын жерлерін сапалы дайындау мен абаттандыруды қамтамасыз ету қажет.
 

• 05.05.2023
• 140