Павлодарда дәрігерлер мен медициналық колледж студенттеріне арналған жатақхана салынады.

Қазір осы мақсатта И. Байзақов көшесі, 151/2 мекенжайындағы әкімшілік ғимаратқа жөндеу жүргізу және қайта жабдықтау жұмыстары жүргізілуде.
 
2000 шаршы метр аумақта 107 студент үшін 35 бөлме мен жас мамандарға арналған 30 пәтер (1-2 бөлмелі) құрылады. Сондай-ақ, ғимаратта оқу сыныптары, тренажер залы, кітапхана, кір жуатын орын және т. б. жайлар орналасатын болады.
 
Қазіргі кезде ғимаратта кірпіш қабырғалар қаланып, төбелер мен едендер жөнделді, сантехникалық жабдықтар ауыстырылды. Ішкі инженерлік желілер - сумен жабдықтау, кәріз, жылыту және желдету жүйелерін, қасбетті және кіре берісті жөндеу жұмыстары жүргізілді. Жұмыстарды "Промжилстройкомплекс" ЖШС мердігерлік ұйымы жүргізуде. Жобаны қаржыландыру сомасы 800 млн. теңгеден асты.
 
Бүгін нысанда жүргізіліп жатқан жұмыстармен облыс әкімі Асайын Байханов танысты. Өңір басшысы жобаның жас мамандар мен болашақ дәрігерлер үшін маңыздылығын атап өтіп, оларды өңірге тарту қазір басымдыққа ие екендігін айтты. Ол аталған нысан бойынша жұмыстарды бақылауда ұстауды тапсырды.
 

• 10.05.2023
• 162