Асайын Байханов Тәжікстан Республикасының Төтенше және Өкілетті Елшісі Ибодзода Хайрулломен екіжақты кездесу өткізді.

Кездесуде облыс әкімі өңірдің инвестициялық ахуалы, көлік-логистикалық инфрақұрылымның артықшылықтары, арнайы экономикалық аймақтың преференциялары туралы айтты. - 2023 жылдың I тоқсанында облыстың сыртқы сауда айналымы 16 млн. АҚШ долларын құрады. Өзара саудадағы әлеует әлдеқайда артық. Сіздің сапарыңыз екі жақты сауда көлемін ұлғайтуға жақсы стимул бола алады, - деп атап өтті өңір басшысы. Өз кезегінде дипломатиялық миссияның басшысы қонақжайлылық пен ашықтық үшін алғысын білдірді. - Менің Павлодар облысына келуімнің мақсаты - өңірдің әлеуетін зерттеу және жұмыстағы ең маңызды бағыттарды белгілеу, - деді Хайрулло Ибодзода. Екі тарап Ертіс өңірінен дәнді дақылдар мен ұн экспорттау, сондай-ақ, бағасын арзандату мақсатында Тәжікстаннан ерте шығатын көкөністер мен жемістерді импорттау жөніндегі ынтымақтастықты дамытуға уағдаласты. Сонымен қатар, тәжік тарапы Тәжікстаннан әкелінетін жемістерді сақтауға арналған шағын көтерме тарату орталығының құрылысын қарастыруға дайын.

• 30.05.2023
• 112