Облыс әкімі Асайын Байханов Павлодар қаласында кәріз желілерін салу жұмыстарын орындау барысын тексерді.

Екінші Павлодар шағын ауданында кәріз жүйесінің 3-ші кезеңін салу бойынша екі жылдық жобаны іске асыру жұмыстары жалғасуда. Өткен жылы жұмыстар жүргізу жоспарланған 15 көшенің 12-де өздігінен ағатын коллекторларды төсеу жұмыстары жүргізілді. Ағымдағы жылы 2023 жылдың шілде айының соңына дейін қалған 3 көшеде (Архангельская, Целинная, Литвинов) 3000 метрге жуық желі салу арқылы жұмыстарды аяқтау жоспарлануда. Сондай-ақ, осы мерзім ішінде мердігер кәріз-сорғы жүйесін және қысымды кәрізге монтаж жүргізуі тиіс. Осындай жұмыстар Зеленстрой шағын ауданында да жүргізілуде. Мұнда жоспарланған 12 көшенің ішінен 8 көшеде жұмыстар толығымен орындалды. Қазір мердігер қалған көшелерде жұмыс істей бастады. Бұл ретте жобаны түзету жүргізілуде. Бұған дейін жоба бойынша Зеленстройдың барлық көшелерінен Ломов көшесіндегі негізгі коллекторға жалпы ағынды бағыттау қарастырылған болатын. Қазір оларды Қазправда көшесіндегі кәріз коллекторына қайта бағыттау туралы жобалық шешім қабылданды. Барлық қажетті рәсімдерді ағымдағы жылдың 15 шілдесіне дейін жүргізу жоспарлануда. Асайын Байханов жоспарланған мерзімдерден ауытқымауды және негізгі жұмыстардың сапалы жүргізілуін қамтамасыз етуді тапсырды. Содан кейін міндетті түрде шағын аудан көшелерін абаттандыру жүргізілуі тиіс. Бұдан бөлек, аймақ басшысының тапсырмасы бойынша "Коммунсервис" КММ Зеленстрой шағын ауданында сумен жабдықтау желілерінде қосымша бекіту арматурасын орнату жұмыстарын жүргізді. Бұған дейін тұрғындар Зеленстрой көшелерінің біріндегі су құбырына зақым келген кезде, бекіту арматурасының болмауына байланысты бүкіл шағын аудан сусыз қалатын еді. Қазір бұл мәселе жойылды. Барлығы 20 жаңа ысырма орнатылады, бұл өз кезегінде апаттық жағдайда тек зақымдалған жерлерді ғана оқшаулауға мүмкіндік береді.

• 30.05.2023
• 133