Алматы облысының әкімі Көкөзек ауылының тұрғындарын қабылдады

Бүгін облыстық әкімдікке Көкөзек тұрғындары келді. Олардың айтуынша, ауылдан газ жүргізілетіндіктен, үйлері, жерлері мемлекет мұқтаждығына өтпек. Осы уақытқа дейін жер мен үйлер, басқа да нысандар әлі де бағаланып бітпеген. Ал Қарасай ауданының әкімдігі нысандарды мемлекетке алу үшін ақша маусымда төленетінін айтқан.

Алматы облысының әкімі тұрғындарды қабылдап, олардың сұрақтарына жауап берді.

"Бұл ауылда барлығы 61 үй сүрілейін деп тұр. Қосымша мемлекетке өтетін жерлер де бар. Көкөзектен газ өткізу жобасы облыстікі емес, республикалық үлкен жоба. Сондықтан жерді, үйді мемлекетке алу үшін ақша өңірлік бюджеттен қарастырылмаған. Бағалау жұмыстары әлі аяқталмағандықтан, республикалық бюджеттен ақша бөлінген жоқ. Бағалау жұмысы 1 шілдеде өз мәресіне жетеді. Содан кейін республика резервінен қаражат сұрайтын боламыз", - деді Марат Сұлтанғазиев.

Әкімнің бұл жауабына қанағаттанбаған тұрғындар резервтен ақша түскенше көп уақыт өтетінін айтып, жылыту маусымына дейін баспана алулары керектігін, ал кейбірі жерге үй салуға қамданып жатқандарын тілге тиек етті. 

"Жоғарыда аталған нұсқамен келіспесеңіздер, үйдің орнына Қарасай ауданынан үй, жердің орнына жер қарастырып көрейік. Бұл жұмыспен облыс әкімдігінің мамандары айналысатын болады. Нөмірін алып алыңыздар, бүгінгі кездесуден хаттама толтырылып, әрқайсыңызға жеке-жеке жіберіледі. Ауылға 2 шілде өзім барып қайтамын. Сол кезде осы мәселе тағы қаралады. Оған дейін бірқатар түйіткілдің түйіні де тарқатылып қалуы мүмкін. Өздеріңізбен тілдесіп, ортақ шешімге келеміз", - деді өңір басшысы.

Жүздесуден кейін тұрғындар облыс әкімінің ауылға келуін күтетіндерін айтып, 2 шілде күні нақты шешім табылатынына сенім білдірді.

• 19.06.2023
• 158