Қадірлі батысқазақстандықтар!

Сіздерді сонау Сақ, Алтын Орда мемлекеттерінің заңды мұрагері ретінде ата-бабамыз сан ғасырлар бойы сақтап келген Ұлы Дала елінің қастерлі мерекесі – Қазақстан Республикасының Тәуелсіздік күнімен шын жүректен құттықтаймын!

Алаш ардақтысы Әлихан Бөкейханұлы «Бізде бірлік болып, іс қыла білетін шебер табылса, Алаштың баласы бақыт-махаббат жолына түсті!» деп біздің болашағымызды әдемі болжап кеткен еді. Осы сөздің дәлелі - халқымыздың елеулі еңбегі, Елбасымыздың татулықты ту еткен саясаты деп түсіну қажет.

Тәуелсіздік жылдары елімізде халықтың тұрмысын жақсартуға, өмір сүру сапасын арттыруға бағытталған қыруар жұмыстар атқарылды.

Мемлекеттік қолдаудың арқасында ауыл шаруашылығы өркендеп, өндіріс ошақтары бәсекеге қабілеттілікке бейімделіп, шағын және орта кәсіпкерліктің көкжиегі кеңейіп, жаңа жұмыс орындары көптеп ашылды.

Құрылыс саласы қарқын алып, қазақстандықтарды тұрғын үймен қамту жақсара түсті. Сонымен қатар ең шалғай елді мекендерге дейін сапалы ауыз су, көгілдір отын құбырлары тартылып, жолдар салынуда.

Келер жылы Қазақстан Республикасының Тәуелсіздікке қол жеткізгеніне 30 жыл толмақ. Осы мерейтойлы жылда жарасты тыныс-тіршілігімізбен, жемісті еңбегімізбен халқымыздың бірлігін бекемдеп, берекесін еселеп, ынтымағын нығайтып, ырысын молайта берейік!

Сіздерге бірінші байлық – денсаулық, отбасыларыңызға амандық пен баянды бақыт тілеймін! Еліміздегі әр жанұяда тату-тәтті, жарасты тірлік салтанат құрып, әр үйдің түтіні түзу ұшсын!

Биылғы әлемді жайлаған індеттен түбегейлі құтылып, келер жылы ел Тәуелсіздігінің 30 жылдық мерейтойын емен-жарқын күйде бірге тойлауға жазсын.

Мереке құтты болсын !

• 18.12.2020
• 297