Атырауда Ермек Алдиярқызы Тасқынбаеваның 90 жас мерейтойына арналған Х. Досмұхамедов атындағы Атырау университетінің Ғылыми кеңесінің кеңейтілген отырысы өтті

Атырауда Ермек Алдиярқызы Тасқынбаеваның 90 жас мерейтойына арналған

Х. Досмұхамедов атындағы Атырау университетінің Ғылыми кеңесінің кеңейтілген отырысы өтті

Ермек Алдиярқызы Тасқынбаева - қазақ мектептеріндегі орыс тілі мен әдебиеті пәні мұғалімдерін тәрбиелеген ұстаздық тәжірибесі мол, ұйымдастырушылық қабілеті жоғары педагог, ғылыми басылымдарда жарияланған әдістемелік сипаттағы мақалалардың авторы ұлағатты ұстаз.

Ермек Алдиярқызы 1955 жылы Алматы қаласындағы Қыздар педагогикалық институтын бітіріп, еңбек жолын Құлсары қаласындағы орта мектепте орыс тілі мен әдебиеті пәнінің мұғалімі болып бастаған. 1967 жылы конкурс бойынша Гурьев педагогикалық институтына (қазіргі Х.Досмұхамедов атындағы университет) жұмысқа қабылданып,
1990 жылы құрметті демалысқа шыққанға дейін осы университет қабырғасында ұстаздық етті. Педагогикалық институтта еңбек еткен 23 жылда Ермек Алдиярқызының лекцияларына мыңдаған студент қатысып, кейін өздері де ұстаз болып, шәкірт тәрбиеледі.

Х.Досмұхамедов атындағы Атырау университеті Ғылыми кеңесінің кеңейтілген отырысына Атырау облысының әкімі Серік Шәпкенов қатысты. Өңір басшысы өз сөзінде Ермек Алдиярқызы Тасқынбаеваның шәкірт құрметіне бөленген ұлағатты ұстаздық жолын атап өтті.

–Тарихта ары мен намысын ақ жаулығындай кіршіксіз тап-таза алып өткен асыл аналарымыз жеткілікті. Ермек Алдиярқызы – солардың ізін жалғаған, кейінгіге жалғастырған кесек тұлға. Мақат ауданы, Доссор кенті мұнайшылар отбасында дүниеге келген анамыздың дана да дара жолы бәрімізге үлгі-өнеге. Өмірдің қиын соқпақтарына мойымай Есен Тасқынбайұлымен ағамызбен бір-біріңізге деген үлкен махаббат, сыйластықпен абыройға бөленіп жүре беріңіздер, деді Серік Шәпкенов.

• 11.08.2023
• 145