Атырау облысының әкімі Серік Шәпкеновтің Көрісу күнімен құттықтауы

Атырау облысының әкімі Серік Шәпкеновтің Көрісу күнімен құттықтауы

Ардақты ағайын!

Сіздерді халқымыздың ізгі дәстүрі, әз Наурыздың жаршысы – Көрісу күнімен шын жүректен құттықтаймын!
Президент Қасым-Жомарт Кемелұлы атап өткендей, «Ықылым заманнан бері бабаларымыз бұл күнді «Амал келді, жыл келді» деп ерекше қуанышпен қарсы алған. Дәстүр бойынша осы күні қыстан аман шыққан жұртымыз төс қағысып көріскен».
Әлбетте, ұлтымыздың мызғымас бірлігі мен данышпан даналығын паш еткен жарқын да жасампаз бұл мерекенің бастауы тарих қойнауына жетелейді.
Сақылдаған сары аяз құрсауынан шыққан ата-бабаларымыз осы күні бір-бірімен құшақ жая көрісіп, есен-саулық сұрасып, мәре-сәре болушы еді. Ескімен қоштасып, емен-жарқын көңілмен жаңаны қарсылайтын.
Тамаша дәстүрдің арқасында ғасырлар бойы қалыптасқан салт-дәстүріміз төрге озып, халықтық қалпымыз ұрпақтан ұрпаққа жалғасуда.
Бұл мерекенің басты қасиеті жас буын жүрегіне қайырымдылық, достық ұғымдарын ұялатып, ертеңге сенім, бүгінге құрмет пен өткенге салауат сезімдерін сіңіреді.
Аспанымыз ашық болсын, әр шаңыраққа бақ-береке орнасын.
Еліміздің ырыс-ынтымағы арта берсін!

Игі тілекпен, Атырау облысының әкімі С.Шәпкенов

• 16.08.2023
• 153