Сенбілік аясында облыс әкімі Серік Шәпкенов тұрғындармен бірге тал екті

Сенбілік аясында облыс әкімі Серік Шәпкенов тұрғындармен бірге тал екті

Бүгін Атырауда сенбілік өтті. Оған аймақ басшысы Серік Шәпкенов және облыс, қала әкімдіктерінің қызметкерлері қатысты. Олар республикалық маңызы бар «Атырау-Орал» тас жолының бойына 500 тал екті. Сонымен қатар қаланың өзге аумақтарында да тазарту жұмыстарын жүргізді, деп хабарлайды облыс әкімінің баспасөз қызметі.

Сенбілікте Атырау қаласының климатына төзімді қарағаш, шаған, үйеңкі отырғызылды.

Облыс әкімі шара аясында Сұлтан Бейбарыс даңғылы бойында орналасқан №17, 19, 21, 21а, 25 үйлердің тұрғындарымен кездесті. Аулаларда жаңадан салынған балалар ойын алаңдары мен ашық спорт алаңдарын аралады. Сондай-ақ тұрғындар облыс әкімінен ауладағы қауіпсіздік шараларын қамтамасыз ету мақсатында бейнекамералар санын көбейтуді, үйлердің шатырын жөндеуге ықпал етуді сұрады. Кейін тұрғындар облыс әкімімен бірге аулаға 50 тал екті.

Жалпы Атырау облысының елді мекендерін көгалдандыру мен жасыл аймақтар құрудың 2021-2025 жылдарға арналған Өңірлік жоспары аясында 275 га аумаққа 540 000 ағаш отырғызу жоспарланған. Биыл 54,7 га жерге 111 042 ағаш отырғызылады. Бұл туралы облыстық табиғи ресурстар және табиғатты пайдалануды реттеу басқармасының басшысы Нұрлан Жантоқов мәлім етті.

- Сонымен қатар Атырау облысында ормандарды өсіру мен молайту Кешендік жоспары бойынша 5 жыл ішінде 2 803 гектар орман алқабына барлығы 7 миллион екпе отырғызу жоспарға енді. Соған сәйкес 2023 жылы 573,5 гектар жерге 1 439 мың ағаш көшетін отырғызу жоспарланып, қазіргі уақытта отырғызу жұмыстар жүргізілуде,-деді Н.Жантоқов.

Ал «Атырау қаласын көгалдандыру» мемлекеттік-жекеменшік әріптестік жобасы бойынша «Каспийдормостострой» ЖШС бес жыл ішінде қалаға 25 000 ағаш отырғызу қажет. Яғни 2019 жылдан бастап жыл сайын Атырау қаласы аумағында 5 000 көшет отырғызылып жатыр. Сондай-ақ бұл компания ағаштарды суару, арам шөптен тазарту сынды күтіп-ұстау жұмыстарын жүргізеді.

• 18.08.2023
• 89