Павлодар облысының әкімі жұмыс сапарымен Ертіс ауданына барды

Ертіс ауданының негізгі бағыттарының бірі - дәнді дақылдарды өсіру. Аудан - 309 мың гектарға жуық егіс алқаптарының көлемі бойынша көшбасшы болып табылады. Биылғы жылы өңір егіс алқаптарын тағы 37,6 мың гектарға кеңейту есебінен астық өндірісін ұлғайтуда. Шаруаларды қажетті су көлемімен қамтамасыз ету мақсатында жерді суаруға бөлінетін қаражат көлемі ұлғайтылды. Асайын Байханов «КМ Ertis Agro» ЖШС суару жобасының және «ОХ «Ертіс» ЖШС суармалы учаскесінің іске асырылу барысын тексерді. -Жаңбырлатып және тамшылатып суару жабдықтарын, коллекторлық-дренаждық жүйелер арқылы суды қайта пайдалану технологиясын қолдануды кеңейту қажет, - деп тапсырды өңір басшысы. Одан кейін облыс әкімі республика бойынша алғашқылардың бірі болып, «Фадеев сызығы» жабдығын пайдаланып жатқан Абай атындағы ЖШС-де және «Замандас» ШҚ болды. - Бұл мықты тұқым өндірудің жұмсақ фракциялық технологиясы. Павлодарлық астық өсірушілердің осындай инновацияларға қызығушылық танытқанына қуаныштымын. Мұндай әдістер максималды түрде өнім алуға мүмкіндік береді, - деп атап өтті Асайын Байханов. Кез-келген елді мекенді абаттандырудың маңызды факторы жолдардың сапасы болып табылады. Биыл «Ертіс» станциясына дейінгі автожолды орташа жөндеу жұмыстары аяқталды. Тұрғындардың өтініштері бойынша Қараөткел және Кеңес ауылдарына кірме жолдар жөнделді. Ертіс ауылындағы кентішілік жолдарға орташа жөндеу жұмыстары аяқталды. Қыркүйек айында Бұланбай ауылының кірме жолына орташа жөндеу жұмыстары аяқталады. Келесі жылы аудандық маңызы бар 22 шақырым жол жаңартылады. Асайын Байханов Ленино – Амангелді айналма жолының учаскесінде болып, ЖСҚ-ға түзету жүргізуді және республикалық бюджеттен қаражат бөлуге өтінім бойынша мәселені пысықтауды тапсырды. Жұмыс сапары барысында Асайын Байханов «Ауыл-ел бесігі» бағдарламасы бойынша ауылдардың әлеуметтік инфрақұрылымының кешенді дамуын тексерді. Биыл Амангелді ауылында аталмыш бағдарлама бойынша мектепті күрделі жөндеу және кентішілік жолдарды жөндеу жұмыстары жүргізілуде. Әкім барлық жұмыстарды 20 тамызға дейін аяқтауды тапсырып, бұл жобаны іске асыру ауылдың дамуына жаңа серпін беретінін атап өтті. Ауданда екі жыл ішінде 6 ауылды жаңғырту жоспарланған. Өңір басшысы аудан әкімдігіне ауылдардың қажеттіліктерін негізге ала отырып, тұрғындардың барлық ұсыныстары мен тілектерін назарға алып, жобалық құжаттаманы әзірлеуді тапсырды. Сондай-ақ, Асайын Байханов Ұзынсу ауылының су құбыры құрылысының барысымен танысты, оны тамыз айында аяқтау жоспарланып отыр. Осылайша, ауданның сумен қамтамасыз ету көрсеткіші 96,3% құрайтын болады. Өңір басшысы жобаны аяқтау, суды қосымша тазарту және тұзсыздандыру мәселесін қосымша пысықтау жөнінде тапсырма берді.

• 25.08.2023
• 173