Жылыту маусымына толығымен дайын болуымыз керек

Бүгін кезекті аппараттық кеңесте алдағы жылыту маусымына дайындық мәселесін қарадық.

Басты талап – жылыту маусымы кезінде тұрғындар мен мекемелердің кедергісіз әрі тұрақты жылумен қамтылуы. Ол үшін тиісті мекемелердің жұмысында ешқандай мәселе туындамауы тиіс.

Энергетика және тұрғын үй коммуналдық шаруашылығы басқармасының мәліметінше, облыс бойынша 9 негізгі жылу энергетика кешені және 593 автономды қазандық бар десек, олармен жалпы 1 737 әлеуметтік нысан мен 1649 көпқабатты тұрғын үй жылумен қамтамасыз етіледі.

Жиында осы кешендер мен қазандықтардың жылыту маусымына қаншалықты дайын екендігін талқыладық. Сондай-ақ, жылу құбырларын ауыстыру және бірқатар қазандықтардың жөндеу жұмыстарының барысын сараладық. Тұрғындар мен мекемелердің коммуналдық қызмет үшін қарыздарын есептеу және қайтару шаралары да назарға алынды.

Бұл бағытта мәдениет, білім, денсаулық сақтау, спорт салаларындағы нысандардың да дайындығы бойынша тиісті басқармалардың есебі тыңдалды. Бірқатар аудан әкімдерінен де жауаптар алынды.

Жиын қорытындысымен жауапты тұлғаларға барлық тіршілікті қамтамасыз ету нысандары мен инженерлік желілердегі жөндеу жұмыстарын бекітілген кестеге сәйкес атқарылуын бақылау, жылу желілерін жөндеу және көпқабатты тұрғын үйлердің жылыту маусымына дайындау жұмыстарын қазан айына дейін аяқталуын қамтамасыз ету, автономды қазандықтар мен тұрғындарға қажетті көмірдің жеткізілуін тұрақты қадағалау, коммуналдық қарыздарды өтеу бойынша тұрғындар арасында түсіндіру жұмыстарын жүргізіп, қажет болған жағдайда әкімшілік шараларды қабылдауды тапсырдым.

• 20.09.2023
• 196