Жамбыл облысында екі күн бойы Қазақстан мен Қырғызстанның Өңіраралық ынтымақтастық форумы өтті.

Бұл шараның 2000 жылдан астам тарихы бар, Қырғыз Республикасымен шекараласатын облыс орталығы - Тараз қаласында өтуінің маңызы зор.

Қазақ-Қырғыз іскерлік диалогынан басталған ауқымды шара барысында суды пайдалану, энергетика, сауда, өндірістік кооперация, транзит және көлік, ауыл шаруашылығы, туризм секілді бірқатар салалардағы мемлекетаралық ынтымақтастық мәселелері талқыланды.

Сондай-ақ, Достық үйінде екі елдің іскер топ өкілдері B2B форматында келіссөздер жүргізді.

Ал екінші күні форум аясында Тараз қаласында Қазақстан Премьер-Министрі Әлихан Смайылов пен Қырғызстан Министрлер кабинетінің төрағасы – Президент Әкімшілігінің Басшысы Ақылбек Жапаровтың қатысуымен қазақ-қырғыз Үкіметаралық кеңесінің 11-ші отырысы өтті.

Шағын және кеңейтілген құрамда өткен келіссөздер барысында тараптар екіжақты ынтымақтастықтың өзекті мәселелері бойынша пікір алмастық.

Үкімет басшысы бірқатар маңызды бірлескен жобаны іске асыруды жеделдету қажеттігін атап өтті.

Қазақстан мен Қырғызстан Үкіметтерінің басшылары екі елдің мүдделерін ескере отырып, өзара құрмет пен тату көршілікке негізделген су саласындағы тығыз өзара іс-қимылды жалғастыруға келісті.

Бұл мәселе Жамбыл облысы үшін айрықша өзекті десек, алдағы уақытта да су ресурстарын бірлесіп пайдаланудың құқықтық тетігін жетілдіру өзара тиімді ынтымақтастықты нығайтуға ықпал етері сөзсіз.

Екі күндік форум қорытындысына сәйкес, екі ел кәсіпорындары арасында $65 млн-нан астам сома көлеміндегі бірқатар коммерциялық құжаттарға қол қойылды.

Сонымен қатар тараптар ынтымақтастықтың барлық бағыттарын, соның ішінде өңіраралық байланыстарды тереңдетуді қолдайтындықтарын жеткізді.

• 25.09.2023
• 144