АТЫРАУДА ЖЫЛДЫҢ ҮЗДІК КӘСІПКЕРЛЕРІ АНЫҚТАЛДЫ

«Атырау облысында жыл қорытындысымен үздік кәсіпкерлерді марапаттау салтанаты өтті», - деп хабарлайды Атырау облыстық коммуникациялар қызметі.

Іс-шараға облыс әкімінің орынбасары Әлібек Нәутиев қатысып, пандемия кезеңінде көрсеткен көмектері үшін кәсіпкерлерге алғысын білдірді.

- Биыл «оңай жыл» болмағаны барлығымызға белгілі.​ Пандемияға байланысты түрлі мәселелер туындады,​ қиындықтар болды. Әсіресе, алғашқы кезеңде ауруханаларда Ивл аппараттары, басқа да қажетті құралдар жетіспей, қарапайым медициналық бетперде, дәрі-дәрмек жетіспеушілігі де орын алды. Сол уақытта жергілікті кәсіпкерлер тарапынан үлкен көмек көрсетілгенін атап өткім келеді. Осындай ерен еңбектеріңіз үшін облыс әкімі Махамбет Досмұхамбетовтің атынан алғыс білдіремін, - деді Әлібек Нәутиев.

Жылы лебізін білдірген облыс әкімінің орынбасары өңірдегі кәсіпкерлікті дамытуға үлес қосып жүрген 8 кәсіпкерге Атырау облысы әкімінің алғыс хатын табыс етті.​ Сондай-ақ жиын барысында «Жыл кәсіпкері 2020» байқауының жеңімпаздары анықталды.​ Атап айтқанда,​ «Бизнес жобаның жаңашылдығы» номинациясымен Бақытжан Дариева, Самал Жұмашева, Абзал Артықбаев, «Жыл меценаты 2020» номинациясымен Әсет Мәмбетов, Болат Бушанов, Төкен Жұмағұлов, «Жыл кәсіпкері 2020» номинациясымен Қанат Сыдихов, Марат Өмірзақов марапатталды. Ал «Жыл кәсіпкері 2020» номинациясының жеңімпазы болып «Брандо» ЖШС-ның құрылтайшысы Махмут Миралиев танылды.

«Жыл меценаты 2020» аталымымыен марапатталған «Транс – Ойл ББ» ЖШС директоры Болат Бушанов жергілікті кәсіпкерлерді көмек көрсетуге шақырды.

- Өзім кәсіпкер болғандықтан​ «қиын кезеңде жерлестеріме көмек көрсетуім керек» деген шешімге келдім. Сондай оймен дәрігерлерді қонақ үй мен ыстық тамақпен қамтамасыз еттік. «Ақ халатты абзал жандарға тиісті көмек көрсету арқылы індетті бірге жеңеміз» деген ойдамын. Ел тыныш, жұрт аман болғанда ғана қандай сала болмасын дамиды, өркендейді. Осы орайда, кәсіпкерлерді бірігіп көмек көрсетуге шақырамын, - деді Болат Бушанов.

• 06.01.2021
• 261