Жамбыл облысындағы ветеринариялық мекемелерге жаңа қызметтік көліктер берілді

Бүгін облыстағы бірқатар ветеринариялық мекемелерге қызметтік жаңа автокөліктер табыстадық. Арнайы жабдықталған 10 УАЗ көлігі облыстық бюджет есебінен алынған.

Бұл шаралар ветеринария саласының жұмысын жандандыруға оң ықпал етеді деп ойлаймын.

Мемлекет басшысы Қасым-Жомарт Тоқаев 2021 жылғы Қазақстан халқына Жолдауында ветеринария саласын реформалауға, орталық пен өңірлердің нақты міндеттерін айқындауға, ветеринария жүйесін цифрландыруға, мамандарды даярлауға, жалақыны арттыруға қатысты маңызды міндеттер жүктеген болатын.

Президент тапсырмасын орындау, қордаланған мәселелерді шешу бойынша түрлі шаралар қабылданып, жұмыстар атқарылуда.

Қазіргі таңда облыстың ветеринариялық ұйымдарын орталықтандыру бойынша жұмыстар жүргізілуде. Аудандардағы ветеринариялық станциялары тек өздеріне тән функцияларды ғана атқаратын болады. Қосымша қаржылық-шаруашылық жүргізу жұмыстарын облыстық деңгейде құрылатын кәсіпорын орындайды. Үнемделген қаражат есебінен ауылдық жердегі мал дәрігерлерінің жалақылары шамамен екі есеге дейін артады.

Сондай-ақ, Жамбыл ауданындағы үй жануарларын уақытша ұстау пунктінің (питомник) ғимаратының жай-күйімен, жұмысымен таныстым. Нысандағы жануарлардың тамақтану және күтіміне назар аудардым.

Мұндай ғимарат Байзақ, Жуалы, Мойынқұм аудандарында да салынған. Алдағы уақытта Тараз қаласы мен барлық аудандарда бой көтеретін болады. Ол үшін арнайы орындар белгіленіп, жер телімдері анықталған.

Айта кетейік, бүгінде облыстың ветеринария саласында өзекті мәселелер аз емес. Олардың шешу жолдарын, нақты нәтижеге қол жеткізу шараларын тікелей бақылауда ұстайтын боламын.

• 04.10.2023
• 186