Ұлытау облысының әкімі Берік Әбдіғалиұлына Жезқазғандағы Металлургтер алаңының эскизі таныстырылды

«Қазақмыс» корпорациясы» ЖШС Басқарма төрағасы Нұрахмет Нұриевтің айтуынша саябақтағы қайта жөндеу жұмыстары желтоқсан айында аяқталады. Белгілі болғандай болашақ демалыс орны 30-ға жуық сирень және 40 шақты жеміс ағашымен ерекшеленбек.

Қазіргі уақытта жүргізіліп жатқан жұмыстардың жалпы аумағы 0.7 гектар, оның 5600 шаршы метрінде алаңның жабыны ауыстырылады. Тағы бір ерекшелігі - аумағы 115 ш.м. болатын құрғақ фонтан орналасады.

Сондай-ақ 1606 шаршы метр аумақ жасыл желекпен қоршалып, тамшылатып суару әдісі іске қосылады деп жоспарлануда. Белгілі болғандай, саябақтың сақтап қалуға келетін ағаштары мен орта тұсындағы ескерткіш сүрілмейді.

Саябақта 4 ойын алаңы орнатылу жоспарда бар, бүгінгі таңда оның екеуі облыс орталығына жеткізілген. Демалушыларға арналған 55 орындық орнату да көзделген. Саябақтың сыртындағы жол бойына биіктігі 8 метр болатын 6 жарықтандыру, ішіне 4 метрлік 8 жарықтандыру орнатылады деп күтілуде.

Басқарма төрағасының айтуынша қаладағы вандализмді болдырмау үшін бейнекамераларды орнатуға арналған стендтер қойылады, оған қоса полиция бекінісін орнату көзделген.

• 09.10.2023
• 177