Облыс әкімі жұмыс сапарымен Екібастұзда болды

Өңір басшысы кеншілер қаласының ЖЭО және жылу магистральдарындағы жөндеу жұмыстарының барысын, сондай-ақ, әлеуметтік нысандардың дайындығын тексерді. Жұмыстардың аралық қорытындысы «Екібастұзжылуэнерго» ЖШС-де өткен жылу беру маусымына дайындық жөніндегі жиналыста шығарылды. Облыс әкімі бір айдан кейін жаңа жылу беру кезеңі басталатынын еске салды. - Жалпы Екібастұзда жылумен жабдықтау нысандарын, тұрғын үйлер мен әлеуметтік нысандарды дайындау қарқыны жақсы. Жұмыстардың басым бөлігі аяқталу сатысында, - деп атап өтті өңір басшысы. Екібастұз ЖЭО-дағы екі энергетикалық қазандықтағы жұмыстар жүз пайызға аяқталды. 20 қыркүйекке қарай тағы үш қазандық агрегатын тапсыру жоспарлануда. Жылу беру маусымының басына дейін бес қазандық дайын болады. Бұл 30-32 градустан төмен температурада жұмыс істеу үшін жеткілікті. Тағы екі қазандықтағы (11, 15) жөндеу жұмыстарының 60%-дан астамы орындалды. Сондай-ақ, мердігер ұйымдар 2, 5, 8 және 12 жылу магистральдарындағы жұмыстарды аяқтауда. Бірқатар учаскелерде қалпына келтіру жұмыстары басталды. Желілердегі барлық жұмыстар, соның ішінде, жаңа желілерді жуу және толтыру 22 қыркүйекке қарай аяқталады деп жоспарлануда. Гидравликалық сынақтардың қорытындысы бойынша анықталған 119 ақаудың 96-сы жойылды. Қалған жұмыстар 20 қыркүйекке дейін аяқталады. Облыс әкімі жылу саласындағы қызметкерлерге және мемлекеттік органдарға жылу беру маусымына дайындық мәселесін қатаң бақылауда ұстауды, қаланың жылу желілері мен Екібастұз ЖЭО-дағы барлық жөндеу жұмыстарының бекітілген мерзімде аяқталуын қамтамасыз етуді тапсырды.

• 11.10.2023
• 99