Облыс әкімі Асайын Байханов жұмыс сапарымен Ақсу қаласында болды.

Өңір басшысы 2017 жылы іске асырылып бастаған жоба - жаңа қазандыққа барды. Осы уақытқа дейін нысан пайдалануға берілмеген, өйткені, мердігер ұйым мемлекеттік сараптамадан өткен қолданыстағы бекітілген жобадан тыс қосымша ұсақтау жабдығын орнатқан. Бұған дейін облыс әкімі аталмыш жабдықты алып тастап, қазандықты іске қосуды немесе жобаға түзету енгізіп, оны заңдастыруды тапсырған болатын. Қазіргі уақытта мердігер ұйым мемлекеттік сараптамаға қайта бағытталған жобаны түзетуде, оның нәтижелерін қазан айының соңына дейін алу жоспарлануда. Сараптаманың оң қорытындысын алған жағдайда іске қосу-баптау жұмыстарын жүргізу жоспарлануда. Сондай-ақ, Асайын Байханов АФЗ аумағындағы қалалық жылу беру қазандығының да дайындығын тексерді. Мұндағы АФЗ қазандығының негізгі жабдықтарына ауқымды жөндеу науқаны жүргізілді, 4 қазандық жаңартылды және тағы 2 қазандыққа жөндеу жүргізілуде, оны қазан айында аяқтау жоспарлануда. Өңір басшысы Ақсудың тіршілікті қамтамасыз ету нысандарын аралау қорытындысын жылу беру маусымы бойынша өткен кеңесте шығарды. Ақсу әкімі Нұрлан Дүйсембиновтың ақпараты бойынша, 5,2 км жылу желілерін жөндеу 90%-ға орындалды, жұмыстар қыркүйек айының ортасына дейін толықтай аяқталады. Гидравликалық сынақтардан кейін анықталған магистральдық және орамішілік желілердегі 19 ақау 100% жойылды. Көпқабатты 264 тұрғын үйдің 87% немесе 230-ы алдағы жылу беру маусымына дайын. Өңір басшысы барлық көппәтерлі тұрғын үйлерді дайындауды 15 қыркүйекке дейінгі мерзімде аяқтауды тапсырды. Сондай-ақ, сапар барысында облыс әкімі әлеуметтік нысандарды тексерді, бассейн салу, балабақшаны күрделі жөндеу және келесі жылға қолдау көрсетілетін қалалық саябақты қайта құру жобаларымен танысты. Бұдан басқа, «АгроЛогистик» ЖШС нысанында болып, «Ауыл Аманаты» жобасының қатысушыларымен кездесті.

• 11.10.2023
• 120