Роман Скляр Павлодар облысының жылу беру маусымына дайындық барысымен танысты

ҚР Премьер-Министрінің бірінші орынбасары Роман Скляр Павлодар облысына жұмыс сапарымен барып, облыс орталығының жылу көздерінің қысқы кезеңге дайындығын, сондай-ақ, Екібастұз қаласындағы ЖЭО мен жылу магистральдарын қайта жаңарту жұмыстарын тексерді.   Жөндеу жүргізу жоспарланған 40 бірлік энергия көздері жабдықтарының 18 нысанында жұмыстар орындалды, қалғандары бойынша жөндеу жұмыстары кестеге сәйкес жүргізілуде. Барлық ЖЭО отын қорымен толық көлемде қамтамасыз етілген.   - Инвестициялық бағдарлама 2029 жылға дейін есептелген, мүмкіндіктерді толық пайдалану, негізгі құралдарды жаңарту, тозу деңгейін азайту, жылумен жабдықтау сенімділігін жақсарту қажет, - деді Роман Скляр.   Алдағы жылу беру маусымының қалыпты және қауіпсіз өтуі мақсатында жоспарлы түрде инженерлік инфрақұрылым, сондай-ақ, әлеуметтік сала және тұрғын үй қоры нысандарының жылуды қабылдауға дайындық жұмыстары жүргізілді.   - Алдағы жылу беру маусымына өңірдің барлық әлеуметтік нысандары толықтай дайындалған, тұрғын үй қоры 98%-ға дайын. Облыстың үш қаласындағы гидравликалық сынақтардан кейін анықталған ақаулар толығымен жойылды. Екібастұзда 4 магистральдық жылумен жабдықтау желілерін қайта жаңарту аяқталуда. Ауа-райына сүйене отырып, жылу беру маусымын 30 қыркүйек-1 қазаннан бастауды жоспарлап отырмыз, - деді Асайын Байханов.   Сондай-ақ, жұмыс сапары барысында ҚР вице-премьері Екібастұз ЖЭО-да болып, жүргізіліп жатқан жөндеу жұмыстарының барысымен танысты. ЖЭО-дағы жөндеу жұмыстарына 400-ден астам адам жұмылдырылған, барлық жөндеу жұмыстары кестеге сәйкес жүргізілуде. Қыркүйек айының соңына дейін, яғни, жылу беру маусымының басталуына дейін станциядағы 10 қазандықтың 6-ы (3 су жылыту және 3 энергетикалық қазандық) толықтай дайын болады. Қалған 4 қазандықты жөндеуді қазан айының соңына дейін аяқтау жоспарлануда.   - Қысқа біз жөнделген жабдықпен кіреміз. Жөндеу жұмыстары өте ауқымды жүргізілді: қазандықтардың қыздыру беттері ауыстырылды және тұтастай алғанда станцияның барлық жабдықтарына күрделі жөндеу жүргізеді. Қысқа мерзімде қосалқы жабдыққа жөндеу жүргізілді, сондай-ақ, жылу контуры бойынша жұмыстар аяқталуда: станция ғимараттарының қабырғалары мен шатырларын жөндеу. Бұған дейін Екібастұздың жөндеу науқанының тарихында мұндай жағдай болған емес, - деді «Павлодарэнерго» АҚ бас директоры Олег Щемел.   ҚР Премьер-Министрінің бірінші орынбасары «Павлодарэнерго» АҚ басшылығының назарын кеншілер қаласының тіршілікті қамтамасыз ету нысандарындағы қызметкерлерді лайықты төлемақымен қамтамасыз етуге аударды. - Өтемдік тарифтерде ЖЭО қызметкерлерінің жалақысын арттыру міндетті түрде ескерілуі тиіс, - деп атап өтті Роман Скляр.   Жалпы, облыстың барлық жылу көздерінде жылу беру маусымына үлкен дайындық жұмыстары жүргізілді. Қолданыстағы нормативтерге сәйкес 415 мың тоннадан астам көмір және 4 мың тонна мазут дайындалды.

• 11.10.2023
• 114