Облыс әкімдігінде сыбайлас жемқорлықтың алдын-алу мәселелері жөніндегі ведомствоаралық комиссияның отырысы өтті. Комиссия жұмысына өңір басшысы Асайын Байханов пен ҚР сыбайлас жемқорлыққа қарсы іс-қимыл агенттігінің төрағасы Асхат Жұмағали қатысты. Күн тәртібіндегі негізгі мәселе білім беру саласындағы сыбайлас жемқорлық тәуекелдерін талқылау болды.

- Тәжірибе көрсетіп отырғандай, білім беру саласында сыбайлас жемқорлыққа жағдай жасайтын жүйелі мәселелер бар, - деп атап өтті Асхат Жұмағали, - сондықтан, бұл сала цифрландыруды күшейту бөлігінде үнемі жетілдіруді талап етеді. Отырысқа қатысушыларға «Павлодар облысының білім беру ұйымдарындағы бірыңғай цифрлық бухгалтерия» ақпараттық жүйесінің пилоттық жобасы таныстырылды. Оны іске асыру бюджетті жоспарлаудың барлық кезеңдеріндегі процестерді толықтай автоматтандыру арқылы бюджет қаражатын игеру процестеріндегі сыбайлас жемқорлық тәуекелдерін жоюға бағытталған. Бүгінгі таңда жүйе облыстың барлық мектептерінде жұмыс істейді және барлық бюджеттік процестердің ашықтығын қамтамасыз етеді. Өңір басшысы Асайын Байханов облыстық білім басқармасының басшысына мектепке дейінгі ұйымдар үшін де жүйені енгізу мәселесін пысықтауды тапсырды. Отырыс қорытындысы бойынша облыстық әкімдік пен сыбайлас жемқорлыққа қарсы қызмет арасында «Павлодар облысының білім беру ұйымдарында бірыңғай цифрлық есепке алу» пилоттық жобасын іске асыру туралы қаулыға қол қойылды. Алдағы уақытта еліміздің басқа өңірлерінде де осындай шешімдерді енгізу жоспарлануда.

• 11.10.2023
• 252