Екібастұзды ауқымды абаттандыру жұмыстары күтіп тұр

Келесі жылы Екібастұзда көшелерді жарықтандыру, жолдарды жөндеу, аулаларды асфальттау және балалар мен ойын алаңдарын орнату бойынша ауқымды жұмыстарды орындау жоспарланған. Бүгін облыс әкімі орамішілік жарықтандыруы жоқ және басым көпшілігінде подъезд үстіндегі жарықтандыру қолданылатын бірнеше үйдің ауласында болды. 279 аулаға жарықтандыру тіректерін орнату үшін шамамен 900 млн. теңге қажет. Бұл жобаны 2024-2025 жылдары іске асыру жоспарлануда. 1 кезеңде № 3, 4, 5 «А», 5 «Б», 8, 8 «А», 9, 15, 19 және 21 шағын аудандарындағы 150 ауланы жарық және қауіпсіз ету жоспарлануда. Қалған 129 аула 2 кезеңде қамтылады. Сондай-ақ, 2024 жылы 50 ауланы абаттандыру, балалар мен ойын алаңдарын орнату және аула аумақтарына асфальт төсеу жоспарлануда. - Қыруар жұмыс атқаруымыз керек. Қазір көптеген аулаларда асфальт, балалар және ойын алаңдары жоқ. Сондай-ақ, қала көшелері жарықтандырылмаған. Келесі жылы біз бұл жұмыстарды бастап, кейінгі жылдары жалғастыруды жоспарлап отырмыз, - деп атап өтті Асайын Байханов. Сонымен қатар, қаланы аралау кезінде өңір басшысы екібастұздықтар үшін ең танымал демалыс орындардың бірі - «Шахтер» саябағына барды. Аталмыш саябақты қайта құру бойынша тұрғындар мен қоғам белсенділерінің қатысуымен қоғамдық тыңдаулар өткізілді. Мұнда сахнасы бар амфитеатр, балалар және спорт алаңдары, сондай-ақ, егде жастағы жандарға арналған демалыс орындарымен саябақты аймақтарға бөлу жоспарлануда. Өңір басшысы Асайын Байханов «Шахтер» саябағы тұрғындардың әр түрлі топтары үшін қауіпсіз әрі жайлы болуы тиіс және қала тұрғындарының сүйікті орнына айналуы қажет екенін атап өтті. Бұл ретте жұмыстарды өсіп тұрған жасыл желектерге зиянын тигізбей жасау қажет, сондай-ақ, food-аймақ пен балаларға арналған аттракциондар үшін орындарды бірден ескеру қажет.

• 11.10.2023
• 226