Павлодар облысының үздік педагогтары марапатталды

Ұстаздар күніне арналған мерекелік салтанатты іс-шара өңір басшысының құттықтау сөзімен басталды. Асайын Байханов ұстаздарға қажырлы еңбектері мен жоғары жетістіктері үшін алғысын білдірді. - Қазақстанның педагогикалық қызметкерлерінің бірінші съезінде Қаныш Сәтбаев атындағы Баянауыл мектебінің математика пәнінің мұғалімі Сәбит Ибадуллин «Қазақстанның еңбек сіңірген ұстазы» мемлекеттік наградасының иегері атанды. Өткен оқу жылының қорытындысы бойынша 287 оқушы республикалық және халықаралық конкурстар мен олимпиадалардың жеңімпаздары мен жүлдегерлері атанды. «Қазақстанның үздік 100 олимпиадалық мектебі» рейтингінде №8 мектеп-лицей жоғары орынға ие болса, үздік мамандандырылған мектептер арасында дарынды балаларға арналған №3 гимназия лайықты орыннан көрінді,- деп атап өтті облыс әкімі. Аймақ басшысы өңірдің 52 ұстазына марапаттар табыстады. Білім беру жүйесін дамытуға қосқан ерекше үлесі үшін үздік педагогтар «Павлодар облысының білім беру саласына қосқан үлесі үшін» төсбелгісімен және 1000 АЕК мөлшеріндегі сыйақымен марапатталды. Білім беру саласының бірқатар қызметкерлері «Облыс алдына сіңірген еңбегі үшін», «Еңбек ардагері» төсбелгілерін, облыс әкімінің Құрмет грамоталары мен алғыс хаттарын, ҚР оқу-ағарту министрлігінің Құрмет дипломдарын алды. Ақсу қаласы Ыбырай Алтынсарин атындағы ЖОББМ география пәнінің мұғалімі Рина Худас «Жыл мұғалімі-2023» облыстық байқауының Гран-при иегері атанды. Барлық марапатталғандар сыйлыққа ақшалай сертификаттар алды. Марапаттау бағдарламасы мерекелік концертпен аяқталды. Ұстаздарға И. Байзақов атындағы облыстық филармонияның және М. Катаев атындағы оқушылар сарайының әртістері өнер көрсетті.

• 11.10.2023
• 140