Ауылдардағы үй құрылысына басымдық берілмек

Ұлытау облысының әкімі Жаңаарқа ауданына жұмыс сапары аясында Бидайық және Орынбай ауылдарының тұрғындарына жаңа үйлердің кілтін табыс етті. Осылайша баспана кезегінде тұрған төрт отбасы құрылысы биыл аяқталған су жаңа үш бөлмелі үйге қол жеткізді.

Орынбай ауылынан Айткүл Мамыраева және Алтынай Алтынбекова, сондай-ақ Бидайық ауылынан Ксения Асманова, Гүлшат Қожаханова көпбалалы ана ретінде ұзақ жылдан бері баспана кезегінде тұрған.

Айта кетейік, Бидайықта бұл баспана құрылысы араға 35, ал Орынбай ауылында 58 жыл салып жүргізіліп отыр.

Берік Әбдіғалиұлы өз кезегінде енді Жаңаарқа кентіне қарағанда ауданға қарасты ауыл, елдімекендердегі үйлердің құрылысына басымдық берілетінін жеткізді.

Биыл Жаңаарқа ауданына қарасты ауыл, елдімекендерде 9 үйдің құрылысы басталған, оның үшеуі табыс етілсе, қалған алтауы жыл соңына дейін беріледі.

• 13.10.2023
• 186