25 ҚАЗАН – ТӘУЕЛСІЗДІКТІҢ БАСТАУЫ БОЛҒАН МЕРЕЙЛІ КҮН

Құрметті жетісулықтар!

Баршаңызды Республика күнімен шын жүректен құттықтаймын!

Бұл мерекенің атаулы күндер қатарына қайта енгізіліп, жалпыхалықтық мереке ретінде орнығуы тарихи әділеттіліктің салтанат құрғаны деп білеміз. Өйткені Қазақстанның тәуелсіздікке жасаған алғашқы қадамы, саяси-аумақтық жағынан дербес ел ретінде танылуы 25 қазанда қабылданған егемендік туралы Декларациядан бастау алған болатын. Бұл құжат Қазақстанның мемлекеттілік негіздерін қалыптастырып, ұлттық бірегейлігін  орнықтырды.

Қазір елімізде жаңа сипатта дамудың бағытын айқындайтын ауқымды реформалар жүзеге асырылуда. Президенттің бастамашылдығымен қолға алынған бұл іргелі өзгерістер әлеуметтік әділеттілік принципіне негізделіп, тең мүмкіндіктерге, мемлекеттік басқару ісіне әр азаматтың белсенді қатысуына жол ашып отыр. 

Мемлекет басшысы Қасым-Жомарт Тоқаев айтқандай, «Қазақстаннан басқа Отанымыз жоқ. Бағдарымыз –  айқын, мақсатымыз – ортақ. Біз тәуелсіздік тұғырын биік ұстап, мемлекеттігімізді нығайта береміз. Өйткені Отанымыз – бір, мемлекетіміз – бір, халқымыз – бір».

Бұл ретте Жетісу жұртшылығы өзінің татулықты ту еткен ынтымақшыл болмысымен өңірдің игілігін арттыруға елеулі үлес қосып, тәуелсіздігімізді нығайтудағы және ел ырысын еселеудегі ортақ мақсат-міндеттерге белсене атсалыса береді деп сенемін.

Баршаңызға зор денсаулық, отбасыларыңызға амандық, бақ-береке тілеймін. Отанымыз Қазақстан өсіп-өркендей берсін!

• 26.10.2023
• 165