Облыста қызылша ауруы өршіп тұр

Ұлытау облысында қызылша ауруын жұқтырудың 25 жағдайы ресми расталды. Бұл туралы Берік Әбдіғалиұлының төрағалығымен өткен кезекті аппараттық кеңес барысында хабарланды. Облыстық санитариялық-эпидемиологиялық бақылау департаменті басшысының орынбасары Елена Ткаченко жиналғандарды өңірдегі жұқпалы аурулар бойынша ағымдағы эпидемиологиялық жағдаймен таныстырды.

Елімізде қызылшаның 11 мыңнан астам расталған жағдайы тіркелген. Елена Ткаченконың айтуынша, екпе жұмыстарының 1-6 жас аралығындағы балаларға мардымсыз жүргізілуі - аурудың асқынуына әкеліп соғуда.

Сондай-ақ, елімізде және облыста қызылшамен сырқаттанушылықтың өсуіне байланысты Ұлытауда қызылшаға қарсы қосымша иммундау жоспарланғаны атап өтілді. Елена Ткаченко 6 қарашадан бастап 6 айдан 10 айға дейінгі балалар, содан кейін 2-4 жастағы балалар, 18 жасқа дейінгі адамдарға және медицина қызметкерлеріне екпе салынатынын хабарлады. Бүгіннен бастап қызылшаға қарсы қосымша жаппай иммундауды қамтудың күнделікті мониторингі қамтамасыз етіледі.

Жиында өңір басшысы халық арасында ақпараттық-түсіндіру жұмыстарын күшейтуді тапсырды.

«Жұқпалы кеселдің біздің өңірде де дендеп тұрғанын нақты көрсету қажет. Арнайы штаб та сол мақсатта құрылды. Ауруға қатысты мәселенің барлығын бақылауға алған дұрыс. Бұл ретте тұрғындар, ата-аналар арасында, мектептер, БАҚ және басқа да байланыс арналары арқылы ақпараттық – түсіндіру жұмыстарына ерекше назар аудару қажет», - деп атап өтті Берік Әбдіғалиұлы.

• 07.11.2023
• 180