Заңсыз қоқыс үйінділері адам өміріне қауіпті аймаққа айналды

2023 жылдың 14 қарашасында Алматы облысы бойынша экология департаментінің басшысы Қанат Байеділов Ұйғыр ауданы Дардамты ауылы маңында орналасқан заңсыз қоқыс үйінділері алаңын тексерді. Бұл туралы Алматы облысы бойынша экология департаментінің баспасөз қызметі хабарлады. 

Заңсыз қоқыс үйінділері Шонжы – Қалжат бағытындағы республикалық маңызы бар автокөлік магистралінің 50-ші шақырымында орналасқан.

10 жылдан астам уақыт көлемінде кішігірім жыра мен сайды жағалап, қалдықтар қалай болса солай, бейберекет төгіле берген. Күнделікті желдің әсерінен жеңіл фракциядағы қалдықтар (целлофан дорбалар, қағаз, пластик, әйнек ыдыстар, шүберек материалдар) жан-жаққа ұшып жатыр. Бұл алаң кеміргіштертер мен жәндіктердің, ит-құс пен ірі-қара малдардың жайылымына айналған. Ауа, жер және судың ластануы салдарынан климаттың өзгеруі, ауа температурасының көтерілуі, әртүрлі аурулардың таралуына әкеп соғуда. Жануарлар мен өсімдік әлеміне де кері ықпал етіп жатыр. 

Жалпы айтқанда, адам өміріне қауіпті аймаққа айналды. Оған себеп, осы аймақта орналасқан 100-ден аса «Ыстық-су» демалыс орындарының қоқысты заңсыз төгуі. Қоқыстар түнгі уақытта шығарылатыны анықталды.

Сонымен қатар, басқарма басшысы Шонжы ауылының солтүстік шығысында орналасқан заңдастырылған орталық тұрмыстық қатты қалдықтар полигонының жағдайымен танысты. Полигонға бөлінген 8 гектар жер телімі толып, қоршаулары қоқыстың астында қалған. Қоқыс қалдықтары 12-15 гектар жерге жайылып, жанындағы бейіттер мен жеке тұрғын үйлердің аулаларына жеткен.

Қанат Байеділов аудан басшылығына қатаң ескертпе жасады. Тез арада заңсыз қоқыс орындарын жойып, тұрмыстық қатты қалдықтарды басқаруды дұрыс жолға қоюды тапсырды.

• 17.11.2023
• 189