Таразда Халық Қаһармандары мен Еңбек Ерлері бас қосты

«Адам болу – қасиет, азамат болу – міндет, патриот болу – парыз». Батыр Баукеңнің бұл сөзі әр адамның өмірлік ұстанымына арқау болса, ұтарымыз аз болмайды.

Мемлекет басшысы Қасым-Жомарт Кемелұлы Тоқаев та жастар тәрбиесіне үлкен мән беріп, отаншылдық және мемлекетшілдік қасиет әр баланың бойынан табылуы қажет екендігін атап өткен болатын.

Бүгін жайдарлы Жамбыл жерінде, қасиетті Әулиеата төрінде бір топ еліміздің Еңбек Ерлері мен Халық Қаһармандары бас қосты.

Арнайы шақыртуымызбен өңірімізге келген құрметті қонақтардың қатарында Халық Қаһармандары Бақытжан Ертаев, Айдын Айымбетов, Азамат Жұмаділов, Еңбек Ерлері Аягүл Миразова, Алина Соловьева, Алма Шукыжанова, Рышат Амренов, Құралай Байменов, Мұқаш Ескендіров, Тұрсынбек Макишев, Руслан Қуатов, Мұхтар Тулеутаев, Имамзада Шагиртаев, Мұрат Қайыргельдин бар. Олардың қатысуымен екі күнге негізделген бірқатар ауқымды, маңызды шаралар жоспарланған.

Алдымен мәртебелі меймандармен бірге Бауыржан Момышұлы атындағы «Жеңіс» саябағында өткен жас сарбаздардың Ант беру салтанатына қатыстық.

Шара барысында саябақтағы Кеңес Одағының батыры, даңқты жерлесіміз, әскери қолбасшы Бауыржан Момышұлының, Халық Қаһармандары Ғазиз Байтасов пен Мейіржан Аймановтардың ескерткіштеріне гүл шоқтары қойылып, рухтарына тағзым етілді.

Жас сарбаздардың патриоттық сезімдерін жани отыра, елге деген сүйіспеншіліктерін еселеп, оның қауіпсіздігі үшін жауапкершіліктерін нығайта түскен салтанатты шара «Елдің бүгіні мен ертеңіне деген сенім» конференциясына ұласты.

Басқосуда өткені өнегелі, еңбегі елеулі тұлғалардың өмір жолы бүгінгі жас ұрпақ үшін тағлымға толы екендігі айрықша айшықталып, болашақ бағдарларына үлгі екендігі баса айтылды.

Ұрпақ тәрбиесінде осындай тұлғалардың ғұмырын ғибрат ретінде негізге алу – олардың рухты әрі отансүйгіш болып қалыптасуына оң әсер етері сөзсіз.

• 21.11.2023
• 198