Жамбыл облысының үздік мәдениет және өнер ұжымдары марапатталды

Мәдениет және өнер – халқымыздың бай мұрасы, ұлттық руханияттың негізі. Жыр алыбы – Жамбыл бабамыздың есімін еншілеген облысымызда бұл бағытқа баса көңіл бөлінуі – заңдылық.

Мемлекет басшысы Қасым-Жомарт Кемелұлы Тоқаев Ұлттық құрылтайдың отырысында сөйлеген сөзінде «Халқымыздың ата-бабадан мирас болған мол мұрасы бар. Оны заман талабына сай жаңғыртып, жер жүзіне насихаттау керек», - деді.

Осы тұрғыда «Мәдениет – асыл қазынам» атты мәдениет күндері барлық ауданда өткізілген болатын. Ауқымды шара барысында көпшілікке өңір тарихы таныстырылып, дәстүрлі өнер насихатталды.

Бүгін мәдениет күндерінің қорытындысы ретінде гала-концерт өтіп, үздіктерді марапаттадық. «Өнер көзі – халықта» атты өнер ұжымдарының фестивалі, «Ең үздік» ауылдық мәдениет үйі мен әдістемелік кабинеттер іріктелді.

Түрлі аталымдар бойынша жеңімпаз және жүлдегер атанған мәдениет пен өнер ұжымдары қаржылай сыйлықтармен, техникалық жабдықтармен марапатталды.

Ал, мамыр айында бастау алған облыс аудандарының мәдениет күндерінде үздік өнер көрсетіп, екінші орын алған Қордай ауданына автокөлік, бірінші орын иегері Шу ауданына шағын автобус сыйға берілді.

Айта кетейік, жалпы облыста 197 мәдениет үйі мен клубтар болса, биыл тағы 9 нысан пайдалануға берілуде. Бұдан бөлек, 30 нысан күрделі және ағымдағы жөндеуден өтуде.

Бұл бағыттағы қолдаулар алдағы уақытта да жалғасын табады.

• 24.11.2023
• 204