Облыс әкімі жұмыс сапарымен Успен ауданына барып қайтты

Қозыкеткен ауылында Асайын Байханов «Ауыл ел бесігі» бағдарламасы аясында жаңғыртылған мәдениет үйі мен мектепке барды. Ауылдық мәдениет үйінің ғимаратына күрделі жөндеу жүргізіліп, шатыры, қасбеті, жылу, электр және сумен жабдықтау, кәріз және желдету жүйелері жаңартылды, терезелері мен есіктері ауыстырылды. Биыл ауыл мектебі де айтарлықтай өзгерді, шатыры ауыстырылып, электр және жылумен жабдықтау жүйелері жаңартылды, жаңа спорт алаңдары жабдықталды және т. б.

Сондай-ақ, өңір басшысы Богатырь ауылындағы жаңа орталықтандырылған су құбырының жұмысын тексерді. Сумен жабдықтау желісінің жалпы ұзындығы 7,3 км құрайды. Өңір басшысының тапсырмасы бойынша 2024 жылы 72 млн теңге сомасына 2,2 км ауыл ішіндегі жолдар, соның ішінде кіреберіс жолға асфальт төсеу жоспарлануда.

Асайын Байханов аудан тұрғындарын сапалы ауыз сумен қамтамасыз етудің маңыздылығын атап өтті. Қазір тек ауданның 14 ауылы орталықтандырылған сумен қамтамасыз етілген.
- Қызылағаш және Богатырь ауылдарында су құбырлары аяқталып, пайдалануға берілді, Қаратай және Вознесенка ауылдарында құрылысы аяқталуда. Сондай-ақ, Дмитриевка, Надаровка, Чистополь, Ольховка, Травянка ауылдарында кешенді блок-модульдерді орнату мәселесі пысықталуда. Осы жобалар іске асырылатын болса сумен жабдықтау көрсеткіші 97%-ға дейін жетеді, - деді облыс әкімі.

Сапар барысында Асайын Байханов 100 жылдық мерейтойын атап өткен Лозовое ауылының тұрғыны Қорлығайым Ахтамберованың үйіне барып, құттықтап шықты. Тыл еңбеккері ҰОС жылдарында астық жинап, майданға деп жылы киім-кешектер тіккен. Бейбіт кезеңде тың және тыңайған жерлерді игеруге атсалысып, 9 баланы дүниеге әкелген.

Одан кейін өңір басшысы Ковалевка ауылындағы 515 басқа арналған жаңа үлгідегі роботтандырылған сүт-тауар фермасының құрылыс барысымен танысты, «Саптама Етік» ЖК аяқ киім тігу цехына, сондай-ақ, Успенка ауылындағы жаңа мал сою алаңына барды.
Осы жылдың 9 айы ішінде ауданға барлығы 5,3 млрд. теңге инвестиция тартылды. Жыл басынан бері АӨК саласында 4 инвестициялық жоба іске қосылды. 2024 жылға мектептерді, мәдениет үйлерін күрделі жөндеу, дене шынықтыру-сауықтыру кешенін салу, облыстық маңызы бар автокөлік жолын және ауыл ішіндегі жолдарды жөндеу жоспарланған

• 15.12.2023
• 223