Облыс әкімі Асайын Байханов Ақсуға жұмыс сапарымен барып, дауылдың салдарынан зақымдалған әлеуметтік нысандарды қалпына келу жұмыстарын тексерді, балық шаруашылығына барды және жаңа жобалармен танысты

Пограничник ауылында әлеуметтік инфрақұрылымды жаңарту бойынша айтарлықтай жұмыстар жүргізілді. «Ауыл – ел бесігі» бағдарламасы бойынша ауданы 1000 м2 асатын дене шынықтыру-сауықтыру кешенінің құрылысы жүргізілуде. Оны 2024 жылдың көктемінде аяқтау жоспарланып отыр.
Одан кейін Асайын Байханов осы жылы салынған ауылдың фельдшерлік-акушерлік пунктіне барды. Мұнда 1000-нан астам тұрғынға дәрігерге дейінгі медициналық көмек көрсетіліп, жүкті әйелдер мен балаларға профилактикалық тексерулер мен патронаж жүргізілетін болады.
Өңір басшысы ауыл мектебіне де барды. Мұнда жер асты сулары мектеп асханасының іргетасын шайып, салдарынан еден деңгейін теңестіру қажет. Асайын Байханов орын алған жағдайдың нақты себептерін анықтауды және техникалық тексеру жүргізуді тапсырды. Соның нәтижесі бойынша қажетті қаражатты бөлу мәселесін облыстық бюджет комиссиясы қарайтын болады.

Ақсу қаласында тоған балық шаруашылығы қарқынды қолға алынуда. Өңір басшысы «FishStart-Aksu» ЖШС-де болды. Кәсіпорында тұқы, бекіре және форель сияқты балық түрлері өсірілуде. Шаруашылықта балық өсіру техникасы бойынша арнайы оқудан өткен 8 адам жұмыс істейді.

Содан кейін Асайын Байхановқа Ақсу тұрғындарының азық-түлік өнімдерін делдалсыз, тікелей өндірушіден 15-20%-ға арзан бағада сатып алуға мүмкіндік беретін фермерлер базарын салу бойынша жобаны іске асыру барысы таныстырылды. Оны іске қосу 15 жаңа жұмыс орнын құруға және 35 қосымша сауда нүктесін ашуға мүмкіндік береді.
Өңір басшысы «Павлодар» ӘКК-нің Ақсу тұрғындары үшін осындай маңызды нысанды ашу жөніндегі жұмысын сынға алып, оны одан әрі іске асыру бойынша жұмыстарды жандандыруды тапсырды.

Сондай-ақ, облыс әкіміне инженерлік желілерді жөндеу жобасы таныстырылды. Ақсу қаласының әкімі Нұрлан Дүйсембиновтің ақпараты бойынша, биыл 5,4 км жылу желілері мен су құбырлары ауыстырылды, оның ішінде инвестициялар есебінен 1,7 км жылу желілеріне күрделі жөндеу жүргізілді.
Асайын Байханов жұмыс сапарының негізгі себептерінің бірі соңғы уақытта жылумен жабдықтау желілеріндегі апаттар болғанын атап өтті. Өңір басшысы жылу беру маусымының тұрақты өтуін ерекше бақылауда ұстауды және келесі жылы бірінші кезекте қайта құру мен жаңарту жүргізу қажет болатын неғұрлым әлсіз учаскелерге талдау жүргізуді тапсырды.

Дауылды желдің салдарынан Ақсу қаласы мен оның ауылдық аймағында бірқатар әлеуметтік инфрақұрылым нысандары мен тұрғын үйлер зардап шекті. Мысалы, Пограничник ауылындағы мектеп қазандығының құбыры майысқан, қалалық емхана ғимаратының қасбетіне зақым келген, ал, Құрылысшылар көшесі, 42А тұрғын үйінің ауданы 380 шаршы метр болатын шатырын ұшырып әкеткен.

Асайын Байханов қала әкіміне зақымдалған ғимараттарды қысқа мерзім ішінде жөндеуді тапсырды. Қазір барлық зардап шеккен нысандар қалпына келтірілуде, жұмыстарды ағымдағы аптаның соңына дейін аяқтау жоспарлануда

• 20.12.2023
• 127