Құрметті Жамбыл облысының тұрғындары! Қадірлі отандастар!

Баршаңызды Жаңа 2024 жылмен шын жүректен құттықтаймын!

Әрбір жылды шығарып салар тұста біз өткенді ой елегінен өткізіп, жарқын жаңалықтар мен маңызды оқиғаларды еске аламыз.

Тұрақты даму жолындағы елімізбен бірге 2023 жыл тарихы терең Тараз, киелі Әулиеата өңірі үшін де негізгі салалар бойынша жетістіктерге толы болды.

Мемлекет басшысының тапсырмалары мен игі бастамаларын жүзеге асыру аясында өңірімізде көптеген нәтижелерге қол жеткізе білдік.

Облыстың жалпы өңірлік өнімі шамамен 1,3 тлрн. теңгені құраса, өнеркәсіп өнімінің көлемі 800 млрд. теңгеге жуықтады.

Өңірімізге 400 млрд. теңгеден астам инвестиция тартылды. Шағын және орта кәсіпкерлікті дамытудың оң динамикасы сақталуда. Шағын және орта бизнес субъектілерінің саны 20,2 пайызға өсіп, оларда жұмыспен қамтылғандардың саны 108 мыңнан асты.

700 мың шаршы метрге жуық тұрғын үй пайдалануға беріліп, 2500-ден астам отбасы Жаңа жылды жаңа пәтерде қарсы алуға мүмкіндік алып отыр.

Аймағымыздың шалғай аудандарындағы елді мекендерде көптеген әлеуметтік нысандар ел игілігіне берілді. Атап айтқанда, 5 жаңа мектеп, 6 спорт кешені, 14 денсаулық сақтау нысаны мен 8 мәдениет ошағы пайдалануға тапсырылды.

Тұрғындарды таза ауыз сумен және табиғи газбен қамту бағытындағы жобалар да жүйелі түрде жалғасуда.

Бұл жетістіктердің бәрінде барша жамбылдықтардың зор үлесі, елеулі еңбегі бар.

Біз өзара бірлігіміз бен тұрақтылығымыздың арқасында алдағы уақытта да даму динамикасын сақтап, жетістіктерге қол жеткізе береміз деп сенемін.

Құрметті жамбылдықтар!

Жаңа жыл жағымды жаңалық пен қуанышты сәттерге толы болып, әр шаңырақтан шаттық арылмасын!

Еліміз еңселі, халқымыз аман, Тәуелсіздігіміз мәңгілік болсын!

Жаңа жыл құтты болсын!

• 03.01.2024
• 132