Энергетика саласының ардагері Сүйіншілік Тиесовке «Атырау облысының Құрметті азаматы» атағы берілді

Атырау облыстық Мәлихаттың шешімімен энергетика саласының ардагері, ТМД және ҚР Еңбек сіңірген энергетигі, II және III дәрежелі «Барыс» ордендерінің иегері Сүйіншілік Тиесовке «Атырау облысының Құрметті азаматы» атағы берілді. Куәлік пен төсбелгіні Атырау облысы әкімінің орынбасары Қайрат Нұртаев тапсырды.

- Энергетика саласында көп жыл қажырлы еңбек етіп, елдің дамуында өзіндік үлесін қосқан жандардың бірі - өзіңізсіз. Сіздің абыройлы еңбегіңіз ешқашан елесіз қалмайды. Елдің ризашылығы мен алғысына бөлене беріңіз. Сізге сарқылмас күш-қуат пен деніңізге саулық тілеймін, - деді Қ.Нұртаев.

Өз кезегінде Сүйіншілік Тиесов зор қошемет көрсеткен жандарға ыстық ықыласын білдірді.

- Мен Атыраудағы еңбек жолымды 1987 жылы бастадым. Энергетика саласын реформалау және жаңғырту жолында бірқатар жұмыстарды атқарылып, көптеген жетістікке жеттім. Дегенмен марапаттарымның ішіндегі ең жылысы осы «Атырау облысының Құрметті азаматы» атағы болды. Энергетика саласын одан әрі дамытып, жоғары нәтижелер көрсету келесі ұрпақтың қолында. Мен олардың сенімге секем түсірмей, саланың қарқуы оң динамика алатынына сенімдімін, - деді С.Тиесов.

Сүйіншілік Тиесов 1946 жылы 24 тамызда дүниеге келген.

Еңбек жолын 1968 жылы «Целинэнерго» ӨЭБ орталық диспетчерлік қызметінің инженері болып бастап, 1984-1987 жылдар аралығында бас директордың электр желілері жөніндегі орынбасары қызметінде еңбек еткен.

1969-1971 жылдар аралығында Алматы қаласында «Энергосетьпроект» ҒЗИжЖИ релелік қорғау және автоматика бөлімінің инженері, аға инженері қызметтерін атқарды.

1971-1984 жылдар аралығында Қазақ КСР Энергетика және электрлендіру министрлігінің ЖДБ электр режимдерін оңтайландыру қызметінің бастығы, аға инженері, сектор бастығы болды.

1987-1989 жылдар аралығында «Гурьевэнерго» ӨЭБ бас инженері, 1989-1995 жылдары «Атырауэнерго» ӨЭБ бас директоры қызметтерін атқарған.

1995-1997 жылдар аралығында ҚР Энергетика және көмір өнеркәсібі министрінің орынбасары, министрдің бірінші орынбасары болған.

1997-1999 жылдар аралығында ҚР Энергетика, индустрия және сауда департаментінің директоры қызметін атқарған.

1999-2000 жылдар аралығында ҚР Мемлекеттік энергетикалық қадағалау комитетінің төрағасы.

2000-2001 жылдар аралығында «KEGOС» ААҚ вице-президенті, 2001-2004 жылдары «KEGOС» ААҚ Ақмола филиалының директоры.

2004-2016 жылдар аралығында «Электр энергиясы мен қуаты нарығының қазақстандық операторы» АҚ Басқарма төрағасы.

2016-2022 жылдар аралығында «KEGOС» АҚ Директорлар кеңесінің мүшесі, «Самұрық-Қазына» АҚ өкілі болған.

• 12.01.2024
• 300