Облыс әкімі Асайын Байханов «Ертіс» ФК алғашқы жаттығуына барды

Қазақстанның танымал командаларының бірі, еліміздің бес дүркін чемпионы – павлодарлық «Ертіс» Sport-сity спорт кешенінің манежінде алғашқы оқу-жаттығу жиынын өткізді.

Өңір басшысы команданы құттықтап, көптеген келіссөздер мен демеушілерді тартқаннан кейін павлодарлықтардың бірнеше ұрпағы ойындарын көріп өскен футбол клубына «екінші өмір» сыйлауға мүмкін болғанын атап өтті.
- Облыс әкімі болып тағайындалғаннан кейін маған республиканың бес дүркін чемпионы, аты аңызға айналған футбол командасын жандандыру туралы көптеген өтініштер келіп түсті. Мен мұның оңай процесс емес екенін түсіндім, бірақ, біз оны қолға алдық, - деді облыс әкімі.

«Ертісті» жандандыру үшін демеушілік қаражат тартып, жол картасы әзірленді. Клуб жұмысында шетелдік легионерлерсіз, яғни қазақстандық футболшыларды және жергілікті тәрбиеленушілерді тартуға баса назар аударылды.
 
Асайын Байханов Екінші Лига командалары арасындағы біріншілікте ойыншыларға сәттілік тілеп, Бірінші Лигаға жолдама алу және «Ертістің» бұрынғы даңқын қайтару міндетін қойды

• 29.01.2024
• 199