ҚР ИИДМ-де жолдарға ақылы жүйе енгізу мәселесі талқыланды

ҚР Индустрия және инфрақұрылымдық даму министрлігінде министр Бейбіт Атамқұловтың төрағалық етуімен республикалық маңызы бар автомобиль жолдарына ақылы жүйе енгізу мәселесі бойынша жиналыс өтті.

Жиынға вице-министр Берік Қамалиев, Автомобиль жолдары комитетінің төрағасы Сайранбек Бармақов, «ҚазАвтоЖол» ҰК» АҚ Басқарма төрағасы Ұлан Әліпов және «Computer Vision Technologies» ЖШС Басқарма төрағасы Зейнұр Мәйтеков қатысты.

Бүгінге дейін  ұзындығы 5,8 мың км болатын 18 жол учаскесінде төлемақыны бақылау аркаларын орнату бойынша құрылыс-монтаждау жұмыстары аяқталды. Қазіргі таңда 10 учаске тестілік пайдалануға енгізіліп отыр. «Шымкент – Өзбекстан шек., Орал – РФ шек. (Саратов)», «Орал – РФ шек. (Самара) мен Ақтөбе – РФ шек. (Оренбург)», «Щучинск-Петропавл», «Шымкент-Қызылорда», «Шымкент-Тараз», «Тараз-Қайнар», «Қапшағай-Талдықорған», «Қостанай-Тройцк» жол учаскелерінде 41 бағдарламалық-аппараттық кешен орнатылды. Бұдан бөлек, қалған барлық бағдарламалық-аппараттық кешен мен 8 учаскені тестілік режимде іске қосу жоспарланған.

Жалпы, ақылы учаскелерді іске қосудың I кезеңі аясында жүйені ұзындығы 5,8 мың шақырымына енгізу 2021 жылы 30 наурызына көзделіп отыр.

Айтып өткен жөн, 2021 жылы инвестициялық келісімшарттың шеңберінде, сондай-ақ, құрылыс-монтаждау жұмыстары ұзындығы 800 км болатын 5 учаскеде жоспарланған: «Петропавл – РФ шек. (Курганға)», «Щучинск – Зеренді», «Таскескен – Бақты», «Жетібай – Жаңаөзен» мен «Ақтөбе – Қарабұтақ».

Аталған мәселе бойынша өңірлерде жүйелі түрде қоғамдық тыңдаулар ұйымдастырылуда. Мәселен, былтыр желтоқсанда 15 қоғамдық тыңдау өткізілді. Биыл ақпанда 13 учаске бойынша 58 қоғамдық тыңдау ұйымдастыру көзделген.

Айта кетейік, 2025 жылға қарай Қазақстандағы ақылы жолдардың ұзындығы 11 мың шақырымды құрамақ. Жиналған қаржы учаскелердегі ағымдық жөндеу жұмыстарға, жолдарды күтуге, төлем өндіру жүйесіне қызмет көрсету мен инвесторға төлем жасауға жұмсалады. 

• 03.02.2021
• 429