Ақтоты Райымқұлова азаматтарды қабылдады

Бүгін Қазақстан Республикасының Мәдениет және спорт министрі Ақтоты Райымқұлова онлайн форматта азаматтарды жұмыс және жеке мәселелері бойынша қабылдады.

Министрдің қабылдауында болған азаматтардың көтерген мәселесі сан-алуан.

Түркістан облысы, Мақтаарал ауданы, Ж.Нұрлыбаев ауыл округі, Мырзатөбе елді-мекенінің тұрғыны Оңласын Назаров ауылды жерде мәдениет үйі мен спорт кешендерін салу мәселесі бойынша ұсыныстарын айтты. Ақтоты Райымқұлова аталған мәселе «Мәдениет туралы» Заңның 8-ші және 9-бабы 7) тармақшасына сәйкес жергілікті атқарушы органның құзыретіне жататынын жеткізді.

Осы ретте, Түркістан облысы әкімдігінің мәліметіне сәйкес Мақтаарал ауданының орталығы Мырзакент кентіндегі мәдениет үйіне жергілікті бюджеттен қаржы бөлініп, күрделі жөндеу жұмысы жүргізіліп жатқанын, нысан биыл пайдалануға берілетін айтты.

Сонымен қатар Жамбыл, Еңбекші ауыл округі аумағынан жаңадан мәдениет үйін салу үшін арнайы жер телімі анықталып, жергілікті бюджеттен қаржы бөлініп, жобалау сметалық құжаттары дайындалып, жеке сараптама қорытындысы алынғанын жеткізді. Аталған нысандардың құрылыс жұмысын 2022-2023 жылдары жүргізу жоспарланып отыр.

«Ұлттық таэквон-до спорттық федерациясы (ITF)» қоғамдық бірлестігінің жетекшісі Айдос Аманжолов жергілікті спорт федерацияларын аккредиттеуге қатысты сұрақтарын қойды.

Министр «Дене шынықтыру және спорт» туралы Заңға сай, жергілікті спорт федерацияларын аккредитациялау республикалық маңызы бар қалалар мен облыстағы атқарушы органдардың құзырында екенін атап өтті.

Түркістан облысы, Жетісай ауылдық мәдениет үйінде орналасқан музейді заңдастыру бойынша мәдениет үйінің директоры Ботагөз Ділдәбекованың сауалына қатысты Ақтоты Райымқұлова мұражайды заңды тұлға ретінде заңдастыру керегін, Министрлікке музейді құру туралы келісім хат келген жағдайда, заңда белгіленген тәртіппен қарастырылатынын жеткізді. Сонымен қатар бұл мәселе жергілікті әкімдік құзыретінде болғандықтан Министрлік Түркістан облысы әкімдігіне сұраныс хат және облыс әкімі Өмірзақ Шөкеевтің атына ұсыныс хат жіберетінін айтты.

Осыдан кейін министр Қазақстан композиторлар одағының төрағасы Серікжан Әбдінұровтың осы жылы одақтың антологиясын шығару және композиторлар фестивалін ұйымдастыру жайлы өтінішін тыңдады. Ақтоты Райымқұлова одақ төрағасына ұлттық өнерді насихаттау жолындағы қызметі үшін алғыс айтып, баспа ісі саласындағы жылдық жоспар бекітіліп қойғанын және пандемия мен еліміздегі эпидемиялогиялық жағдайға байланысты барлық іс-шара уақытша тоқтағандықтан бұл өтінішті қанағаттандыру мүмкін еместігін жеткізді.

Сондай-ақ жеке мәселе бойынша кездескен ел азаматтары да тиісті жауап алды.

• 05.02.2021
• 236